Ռուսաստանը Հայոց ցեղասպանության ժխտման քրեականացնող օրինագիծը, ինչպես նաև Մոսկվայի պայմանագրի չեղարկման գաղափարն, ըստ էության, որպես լծակ էր դրել Թուրքիայի դեմ:
Ռուսաստանը չի քրեականացնում Հայոց ցեղասպանության ժխտումը. սա ինչ-որ չափով վնասում է հայ-ռուսական հարաբերությունները. Ա. Պապյան
ՍՏԵՓԱՆԱԿԵՐՏ, 11 մարտի, ԱՐՑԱԽՊՐԵՍ: Այս մասին Tert.am-ի հետ զրույցում ասաց թուրքագետ, «Մոդուս Վիվենդի» կենտրոնի տնօրեն Արա Պապյանն՝ անդրադառնալով նրան, որ Ռուսաստանի կառավարությունը և Գերագույն դատարանը բացասական եզրակացություն են տվել Հայոց ցեղասպանության ժխտման համար քրեական պատասխանատվություն ենթադրող օրինագծին:
«Նման վճիռ և որոշում սպասելի էր: Հիմա, փաստորեն, իրենք հասկացան, որ դա չի աշխատում կամ ինչի որ պետք էր հասնել, դրանով հասան, դրա համար էլ նման ընթացք ունեցավ օրինագիծը»,- ասաց Արա Պապյանը:
Հիշեցնենք, որ Ցեղասպանության ժխտումը քրեականացնող օրինագիծը ՌԴ Պետդումա էին ներկայացրել «Արդար Ռուսաստան» կուսակցության պատգամավորներ Սերգեյ Միրոնովը և Նիկոլայ Լևիչյովը:
Այդուհանդերձ, ըստ Արա Պապյանի, պետք է հասկանալ, որ Ռուսաստանն առայժմ գոնե չի ուզում վերջնականապես կամուրջներն այրել Թուրքիայի հետ:
«Եթե մենք նայում ենք Ռուսաստանի՝ այս վերջին մի քանի տարվա վարքը, թեկուզ հենց Ցեղասպանության 100-ամյակի ոգեկոչման հարցում, տեսնում ենք, որ մյուս երկրների համեմատ շատ ավելի պասիվ է. բացի Վլադիմիր Պուտինի այցից, որը պետական այց էր, նույն Ռուսաստանում ռուսական որևէ կազմակերպություն կամ կուսակցություն որևէ բան չարեց»,-նկատեց թուրքագետը:
Միևնույն ժամանակ Արա Պապյանն ասում է, թե բնական է, որ Ռուսաստանը Հայաստանին օգտագործում է իր շահերի համար. «Ինչ-որ անում է Հայաստանի համար՝ լավ, թե վատ, դա Հայաստանի համար չի անում, դա իր շահերի համար է անում. երբեմն այդ քայլերը համապատասխանում են Ռուսաստանի շահերին, դա մեզ համար լավ է ստացվում, եթե չի համապատասխանում՝ վատ»:
Դիտարկմանը, թե Ռուսաստանը Հայաստանի անվտանգության երաշխավորն է և ռազմավարական ընկերը, Արա Պապյանն ասաց, թե եթե խոսքը վերաբերում է կոշտ անվտանգության մասին, զուտ զինված պաշտպանության մասին, ապա Ռուսաստանը մնում է մեր անվտանգության երաշխավորը:
«Մենք էլի ակնկալում ենք պաշտպանություն, ակնկալում ենք, որ հարձակումների դեպքում Ռուսաստանը կկատարի իր պարտականությունները: Այդ ակնկալիքը միշտ էլ կա, նման հարաբերություններ դե յուրե ֆիքսված են մեր հարաբերություններում»,-նշեց Արա Պապյանը՝ հավելելով. «Այն, որ օրինագիծը մերժվեց, հայերի համար դա այնքանով վատ եղավ, որ սա կարող են, այսպես ասած, մեր աչքը մտցնել հերթական անգամ՝ ասելով, որ նույնիսկ Ռուսաստանը չի քրեականացնում Հայոց ցեղասպանության ժխտումը: Սա ինչ-որ չափով վնասում է հայ-ռուսական հարաբերությունները, որովհետև նման հայտարարությունները մարդկանց մեջ ակնկալիքներ են առաջացնում, հետո հիասթափություն է լինում»:
Արա Պապայանն ասաց, թե օրինագծի չընդունման դեպքում շատ լուրջ վնաս չի տեսնում, ինչպես նաև շատ օգուտ էլ չի տեսնում, եթե նույնիսկ այդ օրենքն ընդունվեր:
«Այսպիսի դեպքերում մեզ ավելի անհանգստացնում է ռուսական զենքի վաճառքն Ադրբեջանին, ձգտումը՝ վաճառքը շարունակելու: Սրանց հետևանքներն ավելի դաժան են»,-եզրափակեց թուրքագետը:
