Ֆրանսիա-Ղարաբաղ Բարեկամության շրջանակը, ղարաբաղյան իշխանություններից տեղեկանալով դեպքի վայրում տիրող իրավիճակի մասին, դատապարտում է Ադրբեջանի ռազմական հարձակման քրեական բնույթը Լեռնային Ղարաբաղի նկատմամբ՝ այն համարելով բովանդակազուրկ վարքագիծ:
Միջազգային հանրությունը պետք է վերջ դնի Ադրբեջանի հարձակումներին եւ ճանաչի ԼՂՀ-ն. Ֆրանսիա-ԼՂ բարեկամության շրջանակ
ՍՏԵՓԱՆԱԿԵՐՏ, 5 ապրիլի, ԱՐՑԱԽՊՐԵՍ: «Ալիեւի վարչակարգի կողմից պատվիրված այս պատերազմածին գործողությունները հատկապես պատճառ դարձան մարդկային զգալի կորուստների՝ առանց էական փոփոխություն առաջացնելու առջեւի գծում:
Իրենց բնորոշ հարձակման արդյունքում Բաքվի զինվորները սպանել են նաեւ ղարաբաղյան քաղաքացիական բնակչությանը»,- հայտարարել է Ֆրանսիա-Ղարաբաղ Բարեկամության շրջանակի նախագահ Ֆրանսուա Ռոշբլուանը։ Նրա կարծիքով, «ուշագրավ են դպրոցի ճանապարհին հրետանային ռմբակոծությունից սպանված երեխաների եւ խոշտանգված, այնուհետեւ ադրբեջանական հատուկ ջոկատայինների կողմից դաժանաբար սպանված մեծահասակների դեպքերը․ նրանց՝ այնտեղ ներխուժելու միակ նպատակը քաղաքացիական բնակչության շրջանում սպանություններ իրագործելն էր՝ խուճապային իրադրություն ստեղծելու համար»։
Շրջանակը ուշադրություն է հրավիրում այն բանի վրա, որ Ադրբեջանը միտումնավոր կերպով ռմբակոծել է Մարտակերտի քաղաքացիական բնակչությանը՝ բացահայտորեն խախտելով Ժնեւի համաձայնագրերը: Ճակատային գծի մերձակա բնակավայրերի ազգաբնակչությունը տարհանվել է ավելի անվտանգ վայրեր, սակայն շատ խաղաղ բնակիչներ են վիրավորվել, եւ այժմ գտնվում են հիվանդանոցներումբ:
Բարեկամության շրջանակը համարում է, որ բռնությունների այս նոր պոռթկման համար անձնական պատասխանատվություն է կրում Իլհամ Ալիեւը, եւ միջազգային հանրությանը կոչ է անում աջակցել Ադրբեջանի այլընտրանքային ժողովրդավարական ուժերին՝ վերջիններիս հետ բանակցելու Հարավային Կովկասում խաղաղության եւ Ադրբեջանում ժողովրդավարության հաստատման հարցերի շուրջ։
«Մենք կոչ ենք անում բանակցող կողմերին եւ ներկայումս Վիեննայում գտնվող ԵԱՀԿ Մինսկի խմբին՝ պարտադրել Ադրբեջանին անհապաղ դադարեցնել իր քրեական ռմբակոծումները ղարաբաղյան քաղաքացիական բնակչության վրա: Ինչպես նաեւ կոչ ենք անում միջազգային հանրությանը լիարժեք, ամբողջական եւ վերջնական կերպով ճանաչել Լեռնային Ղարաբաղի Հանրապետության անկախությունը, քանի որ փորձը ցույց է տալիս, որ ճանաչման բացակայությունը կարող է շարունակվել Ադրբեջանի կողմից ընկալվել որպես ռազմական գործողությունների վերսկսման արդարացում», եզրափակել է Բարեկամության շրջանակի նախագահը:
