Անհրաժեշտ է, որ Ռուսաստանը վերացնի ադրբեջանական հանցավոր խմբերի մենաշնորհը սննդամթերքի նկատմամբ եւ սկսի համագործակցել Հայաստանի եւ Լեռնային Ղարաբաղի հետ:
Ռուսաստանը պետք է վերացնի սննդամթերքի նկատմամբ ադրբեջանական հանցագործ խմբավորումների մենաշնորհը. Ստերլիգով
ՍՏԵՓԱՆԱԿԵՐՏ, 7 ապրիլի, ԱՐՑԱԽՊՐԵՍ: Հայերի հետ աշխատելն ավելի հեշտ է, հետո էլ` նրանք բնական եւ որակյալ սննդամթերք են արտադրում, որը պահանջված է Ռուսաստանում: Նման կարծիք է հայտնել ռուսաստանյան քաղաքական եւ հասարակական գործիչ Գերման Ստերլիգովը:
«Ադրբեջանական մաֆիան արդեն տասնյակ տարիներ գրավել է շուկան (Ռուսաստանում), եւ դա բոլորը գիտեն: Մեծածախ բազայի բոլոր շուկաները Լուժկովի ժամանակներից ադրբեջանցիներին են պատկանում, եւ գյուղացիների ու բնական սննդամթերք արտադրողների համար ընդհանրապես անհնար է մուտք ունենալ այնտեղ», - նշել է մասնագետը:
Նրա կարծիքով, Ռուսաստանին անհրաժեշտ է «շեշտը տեղափոխել» ադրբեջանցիներից դեպի հայերը, որովհետեւ նախ հայերի հետ ավելի հեշտ է աշխատել, եւ երկրորդ, Ռուսաստանը Հայաստանի հետ լավ հարաբերություններ ունի:
«Ի վերջո, Հայաստանի հետ մենք երբեք չենք պատերազմել, իսկ Ադրբեջանն ու Թուրքիան համարեք` մի երկիր են, եւ Թուրքիայի հետ մենք անվերջ պատերազմում ենք,-ընդգծել է Ստերլիգովը: Ստացվում է, որ Ռուսաստանն ու Թուրքիան վատ հարաբերություններ ունեն, համարյա` պատերազմական, իսկ երկրի ամբողջ սննդամթերքը ադրբեջանցիներն են վերահսկում, համարեք` թուրքերը: Ստացվում է, որ մենք Թուրքիայից կախվածության մեջ ենք, իսկ դա ուղղակի անհեթեթություն է: Մենք պիտի ոչնչացնենք Ռուսաստանում սննդամթերքի նկատմամբ ադրբեջանական հանցավոր խմբերի մենաշնորհը»:
«Ղարաբաղը Հայաստանի մասն է, ըստ էության: Պատմականորեն դա բնիկ հայկական հող է», - նշել է Ստերլիգովը` հավելելով, որ Լեռնային Ղարաբաղի մասնավոր գյուղացիական տնտեսություններում հրաշալի բնական մթերք են արտադրում, որը շատ պահանջված է Մոսկվայում:
«Ղարաբաղի մաթերքների նման համեղ մթերքներ ուրիշ ոչ մի տեղ չեմ կերել: Դա աշխարհում լավագույն վայրն է էկոլոգիապես մաքուր մթերքի առումով: Եվ այնտեղ մարդիկ աշխատասեր են», - ասել է նա` հավելելով, որ ինքը եւ որդին մտադիր են շուտով ռուսաստանյան սննդամթերային ֆորում կազմակերպել, որին ուզում են հրավիրել ղարաբաղյան մատակարարների:
