Գեներալ-մայոր Արկադի Տեր-Թադևոսյանը աշխարհի բոլոր երկրներում բնակվող հայազգի բարձրաստիճան սպաներին և ռազմական փորձագետներին կոչ է անում միանալ իր առաջարկած ծրագրին, ըստ որի նախատեսվում է ռազմական-ուսումնական կենտրոններում համապատասխան գիտելիքներ փոխանցել, բոլոր նրանց, ովքեր ցանկանում են զինվորագրվել հայոց բանակին:
Արկադի Տեր-Թադևոսյանը ծրագիր է առաջարկել. հայազգի բոլոր բարձրաստիճան սպաներին և ռազմական փորձագետներին կոչ է անում միանալ
ՍՏԵՓԱՆԱԿԵՐՏ, 10 ապրիլի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այդ մասին այսօր Ստեփանակերտի «Արմենիա» հյուրանոցի կոնֆերանս դահլիճում տեղի ունեցած մամլո ասուլիսի ժամանակ ասել է Արկադի Տեր-Թադևոսյանը:
Նրա խոսքով՝ ծրագիրը մշակվել է հաշվի առնելով ադրբեջանական ապրիլյան հերթական ագրեսիայի ընթացքում սկիզբ առած ինքնաբուխ կամավորական շարժումը, որը տվյալ պահն հակառակորդին դիմագրավելու գործում իր ուրույն դերակատարությունն ունեցավ:
Ըստ Ա. Տեր-Թադևոսյանի անհրաժեշտություն է զգացվում որոշակիորեն կազմակերպված բնույթ հաղորդել համաժողովրդական կամավորական շարժմանը, ինչպես նաև թարմացնել առաջնագիծ մեկնող ազատամարտիկների և մյուս կամավորականների ռազմական գիտելիքները:
Մամլո ասուլիսին Ա. Տեր-Թադևոսյանը նշել է, որ իր կոչին արդեն արձագանքել են աշխարհի տարբեր երկրներից հայազգի գեներալներ: Միաժամանակ ներկայացրել է հայտարարության տեքստը, որում մասնավորապես ասվում է.
«Հարգելի աշխարհասփյուռ հայության գեներալներ և ռազմական փորձագետներ
Այսօր հայության առջև ծառացել են կենաց-մահու խնդիրներ: Պանթուրքիզմը փորձեց և շարունակելու է փորձել ծնկի բերել հայ ժողովրդին, որովհետև ՀՀ-ն և ԼՂՀ-ն են այդ գաղափարախոսության կյանքի կոչման հիմնական խոչընդոտներից մեկը: Իրենց յուրահատուկ վայրագությամբ և նենգությամբ, օգտագործելով բոլոր տեսակի զինյալներին և զինատեսակները, իսլամական պետության զինյալներից սկսած մինչև սմերչներ, հարձակվեցին սահմանին կանգնած հայ զինվորի վրա: Չնայած գործադրած բոլոր ջանքերին՝ հայ զինվորը դիմագրավեց և հաղթեց, զոհվեց, բայց չընկրկեց: Շատերը իրենց կյանքը նվիրաբերեցին հայոց աշխարհը կանգուն պահելու սուրբ գործին:
Եվ հիմա, կորստի, ափսոսանքի ու ոգևորության օրերին մենք պետք է լինենք արժանի հայ զինվորին: Մենք իրավունք չունենք նրա գործած սխրանքը իզուր կորցնելու: Եվ որպեսզի լուծվեն հայ ժողովրդի առաջ ծառացած խնդիրները, թշնամին այլևս երբեք չհանդգնի հարձակվել մեզ վրա, առավել ևս ոտք դնել մեր սուրբ հողին, մենք պետք է լինենք միասնական:
Կոչ եմ անում աշխարհասփյուռ հայ գեներալներին և ռազմական փորձագետներին՝ հավաքվել Երևանում՝ հայության առաջ ծառացած խնդիրների լուծումները և համահայկական բանակի ուղիները գտնելու նպատակով:
Մեր միասնությամբ լինենք արժանի մեր զինվորների թափած արյանը»: