Արցախում տնտեսապես ակտիվ բնակչության թվաքանակն այս տարվա 1-ին կիսամյակում կազմել է 61 157 մարդ։

22 օգոստոսի, 2014, 10:33

Ինչպիսին է Արցախում բնակչության զբաղվածության մակարդակը

Արցախում տնտեսապես ակտիվ բնակչության  թվաքանակն այս տարվա առաջին կիսամյակում կազմել է  61 157  մարդ։ Այդ մասին «Արցախպրես»-ի թղթակցի հետ զրույցում հայտնել է ԼՂՀ  ազգային վիճակագրական ծառայության աշխատակազմի սոցիալ-ժողովրդագրության  և  աշխատանքի  շուկայի   վիճակագրության  բաժնի   պետ   Լիլյա   Պետրոսյանը:

Նրա հաղորդմամբ՝ նշված ժամանակամիջոցում   զբաղվածների  թվաքանակը    կազմել է  58 924  մարդ, այդ թվում՝  43 684  հոգի կամ  74,1  տոկոսը վարձու  աշխատողներ են  (ներառյալ  անհատ  ձեռնարկատերերը),  իսկ       15 240-ը կամ 25,9  տոկոսը     ինքնազբաղվածներն են՝   մասնավորապես   գյուղատնտեսության բնագավառում։

Ծառայության բաժնի   պետի տեղեկատվությամբ՝ հուլիսի   1-ի  դրությամբ  ԼՂՀ    աշխատանքի  և սոցիալական   հարցերի նախարարության   աշխատանքի  և  զբաղվածության   բաժնում   հաշվառման են կանգնել 2 537 չզբաղված  քաղաքացիներ, որոնց  88  տոկոսը  ստացել է  գործազուրկի  կարգավիճակ։  Չզբաղվածների թվաքանակը նախորդ տարվա համապատասխան  ժամանակահատվածի    համեմատ  նվազել է  16,6  տոկոսով։ Ընդ որում,  աշխատանք  փնտրող  քաղաքացիների  թվաքանակի աճ  գրանցվել է Ասկերանի, Մարտակերտի  և Մարտունու  շրջաններում՝  համապատասխանաբար՝ 2.1,  4.4  և   16  տոկոս, իսկ գործազուրկների  թվաքանակի աճ՝  Ասկերանի,  Մարտակերտի, Մարտունու  և  Քաշաթաղի   շրջաններում, համապատասխանաբար՝  2.1 , 9.8 , 9.1  և  16 տոկոս։

 Լ. Պետրոսյանի  խոսքով՝  այս  տարվա   հուլիսի  1-ի դրությամբ  գրանցված  2233   գործազուրկներից  միայն   3.9   տոկոսն է    նպաստառու (նախորդ   տարվա     համապատասխան  ժամանակահատվածի  համեմատ՝  290-ով  կամ  76.9  տոկոսով քիչ)։

Նշենք, որ նշված ժամանակահատվածում ԼՂՀ   աշխատանքի   և  սոցիալական  հարցերի  նախարարության   աշխատանքի և  զբաղվածության  բաժին  դիմած  քաղաքացիներից  48-ն ապահովվել է աշխատանքով։