Նախորդ տարին Բերձոր քաղաքի համար նշանավորվել է խմելու ջրի ներքին ցանցի անցկացմամբ, ինպես նաև զգալի աշխատանքներ են իրականացվել փողոցների գիշերային լուսավորման ցանցի ընդլայնման ուղղությամբ:
Բերձորում բնակարանների անհատույց սեփականաշնորհման գործընթացը շարունակվում է
Նախորդ տարին Բերձոր քաղաքի համար նշանավորվել է խմելու ջրի ներքին ցանցի անցկացմամբ, ինպես նաև զգալի աշխատանքներ են իրականացվել փողոցների գիշերային լուսավորման ցանցի ընդլայնման ուղղությամբ:
Այս մասին, նախորդ տարվա ընթացքում կատարած աշխատանքների հաշվետվության ժամանակ ասել է Բերձորի քաղաքային համայնքի ղեկավար Արթուր Սահակյանը, որին ներկա էին ԼՂՀ առողջապահության նախարար Զոյա Լազարյանը և Քաշաթաղի շրջվարչակազմի ղեկավարի տեղակալ Արտուշ Մխիթարյանը:
Ինչպես «Արցախպրես»-ին տեղեկացրեց շրջվարչակազմի «Մերան» պաշտոնաթերթի խմբագիր Զոհրաբ Ըռքոյանը, Բերձորի քաղաքապետը, խոսելով քաղաքային բյուջեի մասին, նշել է, որ 2013թ. այն կազմել է ավելի քան 74 մլն. 847 հազ. դրամ, որից 68 մլն 20 հազ. դրամը ստացվել է պետական բյուջեից, որպես դոտացիա, իսկ մնացած մասը կազմել են սեփական եկամուտները:
Օրակարգային խնդիրներից Ա. Սահակյանը առանձնացրեց մարդկանց բնակարանային հարցերը: «Նախորդ տարվա ընթացքում սեփականաշնորհվել են 290 առանձնատներ և 40 բնակարաններ, իսկ 30 ընտանիքի հատկացվել է շինանյութ` բնակարանները վերանորոգելու նպատակով: Եվս 22 ընտանիքի հատկացվել է տնամերձ հողամաս բնակելի տներ կառուցելու համար»,- ասաց քաղաքապետը` նշելով, որ բնակարանների անհատույց սեփականաշնորհման գործընթացը շարունակվում է:
Ա. Սահակյանը տեղեկացրեց նաև, որ 2013թ. ընթացքում քաղաքում կատարվել են շաբաթօրյակներ, սանմաքրման աշխատանքներ:
Հաշվետվության ավարտից հետո, ներկաները հարցեր ուղղեցին քաղաքապետին, առողջապահության նախարարին և շրջվարչակազմի ղեկավարի տեղակալ Արտուշ Մխիթարյանին: Հարցերը հիմնականում վերաբերում էին խմելու ջրի մատակարարմանն ու որակին, աղբահանությանը, քաղաքային աղբանոցի և կոյուղու կարգավորման խնդիրներին և այլն: Իսկ ներքաղաքային ճանապարհների բարեկարգման վերաբերյալ հարցին պատասխանեց շրջվարչակազմի ղեկավարի տեղակալը՝ նշելով, որ խմելու ջրի ներքին ցանցի աշխատանքներն ավարտելուց հետո, նախատեսվում է իրականացնել բարեկարգման ու ասֆալտապատման աշխատանքներ: