Այսօր կայացել է Լեռնային Ղարաբաղի Հանրապետության 6-րդ գումարման Ազգային ժողովի երրորդ նստաշրջանի լիագումար նիստ:
ԼՂՀ ԱԺ-ն հետևողական է ՝ Ադրբեջանի հանցագործությունները միջազգային ատյաններին ներկայացնելու գործում. Աշոտ Ղուլյան
ՍՏԵՓԱՆԱԿԵՐՏ, 21 ապրիլի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ նախքան օրակարգային հարցերին անցնելը ԼՂՀ ԱԺ պատգամավորներն ԱԺ նախագահ Աշոտ Ղուլյանի գլխավորությամբ հարգել են Ադրբեջանի սանձազերծած ապրիլյան քառօրյա պատերազմում զոհված հայ զինվորների և խաղաղ բնակիչների հիշատակը:
Բացման խոսքում ԼՂՀ Աժ նախագահ Աշոտ Ղուլյանը տեղեկացրել է, որ այս օրերին, նախքան խորհրդարանի լիագումար նիստ հրավիրելը՝ Ազգային ժողովի մարմինների կողմից որոշակի աշխատանքներ են տարվել մշտական հանձնաժողովներում, խմբակցություններում Ադրբեջանի կողմից Արցախի դեմ լայնմասշտաբ ռազմական գործողությունների ու դրանց հետեւանքների վերաբերյալ խորհրդարանի քաղաքակական դիրքորոշումը ներկայացնելու, ագրեսիայի արդյունքում առաջացած հումանիտար խնդիրները քննարկելու, եզրակացություններ ձեւավորելու ուղղությամբ:
«Ապրիլյան առաջին օրերի մեր ապրումները մեծամասամբ կապված են այն սխրագործությունների հետ, որոնք մեզ հպարտություն են հաղորդել Հայոց բանակի՝ Պաշտպանության բանակի ու, առաջին հերթին, նրա 18-20 տարեկան զինվորների եւ նրանց հրամանատարների անձնազոհ ջանքերի օրինակներով:
Խորը կսկիծով ենք ընդունել Հայրենիքի պաշտպանության համար զինծառայողների զոհվելու եւ քաղաքացիական անձանց սպանվելու լուրերը: Հայրենիք ազատագրած մարտիկների զավակները կասկածի նշույլ չթողեցին երկրի անկախությունն ու ազատությունը կյանքի գնով պաշտպանելու իրենց վճռականության մեջ: Փառք ու պատիվ նահատակներին: Խորհրդարանի կողմից կատարված աշխատանքների համատեքստում կցանկանայի նշել ՀՀ ԱԺ մի քանի պատվիրակությունների այցերը Ստեփանակերտ եւ մեր գործընկերների հետ համագործակցությունը՝ Արցախի խաղաղ բնակչության դեմ բռնարարքների, այդ թվում վայրագ սպանությունների, ինչպես նաեւ հայկական բնակավայրերի հրթիռա-հրետակոծության հետեւանքների ուսումնասիրման եւ միջազգային ատյաններին ներկայացման գործում:
ԱԺ խմբակցությունների ներկայացուցիչներից կազմված հանձնախմբի աշխատանքներն ընթացքի մեջ են, եւ խորհրդարանը շարունակելու է հետեւողական լինել այս ուղղությամբ:
Ապրիլի 2-ին Արցախի Հանրապետության դեմ հերթական անգամ ձեռնարկված ագրեսիան էական փոփոխություններ է մտցրել մեր խորհրադարանական գործունեության մեջ, որտեղ այս պահին ու, վստահ եմ, առաջիկա օրերին լուրջ տեղ է վերապահված նաեւ խորհրդարանական դիվանագիտությանը: Միջազգային խորհրդարանական հարթակներում նույնպես ակտիվ քննարկումներ են ընթացել՝ կապված ադրբեջանա-ղարաբաղյան հակամարտության աննախադեպ սրացման հետ (Եվրախորհրդարան, ԵԽԽՎ):
