Հոլոքոստ վերապրած հրեաների ժառանգ, ԱՄՆ կոնգրեսական Ադամ Շիֆը հայտարարել է, որ ինքը հասկանում է ցեղասպանության վերապրած հայ ժողովրդի ցավը։
Ղարաբաղյան հակամարտության կարգավորման համար Վաշինգթոնը պետք է հրաժարվի հավասար մոտեցման քաղաքականությունից. Ադամ Շիֆ
ՍՏԵՓԱՆԱԿԵՐՏ, 28 ապրիլի, ԱՐՑԱԽՊՐԵՍ: Այս մասին նա ասել է ԱՄՆ Կոնգրեսում Հայոց ցեղասպանությանը նվիրված երեկոյի ժամանակ, հայտնում է NEWS.am-ի թղթակիցը։
«Մի քանի օր առաջ ես խոսում էի հորեղբորս հետ։ Նա 90 տարեկան է։ Նա հիշում էր մեր ազգականներին, որոնց կորցրել ենք Հոլոքոստի ժամանակ։ Մենք գուշակում էինք՝ նրանք սպանվե՞լ են, թե՞ կարողացել են փրկվել։ Արդյոք Իսրայե՞լ են տեղափոխվել, թե՞ հաստատվել են Ամերիկայում։ Նույնն էլ հայերի դեպքում։ Բայց հայերի ցավն առանձնահատուկ է։ Դա առանձնահատուկ է դարձնում այն, որ Թուրքիան եւ անգամ իմ սեփական կառավարությունը չեն ճանաչում այդ ցավը»,- ասել է Շիֆը։
Նրա խոսքով՝ Հայոց ցեղասպանության ժխտումը մեր օրերում նոր հանցագործություններ է ծնում։ «Հենց դա է տեղի ունենում Սիրիայում, որտեղ ցեղասպանություն է տեղի ունենում Թուրքիայի ամենաթողությամբ, որը չի ցանկանում փակել սահմանները վարձկանների առջեւ։ Հենց Թուրքիայի աջակցությամբ եւ ոգեշնչմամբ էլ տեղի ունեցավ հայ ժողովրդի դեմ Ադրբեջանի ագրեսիան»,- նշել է Շիֆը։
Կոնգրեսականը հավելել է, որ Ղարաբաղում խնդրի կարգավորման համար Վաշինգթոնը պետք է առաջին հերթին հրաժարվի հավասար մոտեցման քաղաքականությունից։
«Երբ դուք հավասարության նշան եք դնում տուժող եւ հարձակվող կողմի միջեւ, դուք հարձակվողին խրախուսում եք կրկնել իր արարքը, քանի որ նա գիտի, որ պատասխան չի տալու»,- նշել է Շիֆը։
Նրա խոսքով՝ կոնգրեսականների մի խումբ մտադիր է մոտ ժամանակներս վերականգնել Ադրբեջանին ամերիկյան ցանկացած ռազմական օգնություն ցուցաբերելու արգելքը։
