Այս պահին առաջնային, կարեւորագույն խնդիրը ղարաբաղյան հակամարտության տարածաշրջանում խաղաղության եւ կայունության պաշտպանումն է։
Վիեննայում հանդիպումների նպատակը տարածաշրջանում խաղաղության եւ կայունության ամրապնդման հարցում առաջընթացն է. Բաբայան
ՍՏԵՓԱՆԱԿԵՐՏ, 16 մայիսի, ԱՐՑԱԽՊՐԵՍ: Այս մասին ասել է ԼՂՀ նախագահի մամուլի խոսնակ Դավիթ Բաբայանը՝ – NEWS.am-ի թղթակցի խնդրանքով մեկնաբանելով Վիեննայում պլանավորված հանդիպումները։
Արցախի նախագահի մամուլի խոսնակը հիշեցրեց, որ ՀՀ նախագահ Սերժ Սարգսյանը 3 պայման էր նշել, որոնց կատարման դեպքում բանակցային գործընթացում առաջընթացը հնարավոր է։ Ավելի ուշ համանախագահները հայտնել էին Վիեննայում հանդիպում կազմակերպելու մտադրության մասին, փաստացի խոսելով նույն կետերի մասին։
«Այս պահին հայտնի չէ, թե կկայանա արդյոք Հայաստանի եւ Ադրբեջանի նախագահների հանդիպումը Վիեննայում, բայց առանց դրա էլ Վիեննայի հանդիպումները կարեւոր նշանակություն ունեն տարածաշրջանում խաղաղության եւ կայունության ամրապնդման համար։ Մենք վաղուց ենք ասում, իսկ համանախագահներն էլ հայտարարում են միջադեպերի հետաքննության մեխանիզմների անհրաժեշտության մասին։ Դա կարող է լրացուցիչ տեխնիկական եւ մարդկային միջոցներ պահանջել»,- նշել է Դավիթ Բաբայանը։ Նրա խոսքով՝ դա կարող է նշանակել շփման գծի ողջ երկայնքով սարքերի, հաղորդիչների տեղադրում, հնարավոր է համանախագահող երկրների ներուժի օգտագործում, օրինակ, զորքերի տեղաշարժը հսկող արբանյակներ այն դեպքերում, երբ դրանք ագրեսիվ բնույթ են կրում։
«Ցանկացած դեպքում դա հագեցած եւ երկարաժամկետ գործընթաց է։ Սակայն առանց այդ գործընթացի անհնար է առաջ գնալ եւ մոտենալ ավելի բարդ խնդիրների լուծմանը, ինչպիսիք են սահմանները եւ կարգավիճակը։ Այդ ուղղությանը քիչ ուշադրություն է հատկացվել, սակայն ժամանակն է ջանքեր գործադրել։ Եթե 1994-ին գործող նախագահի անձնական ներկայացուցչի գրասենյակն արդյունավետ էր աշխատում՝ ամեն ամիս մշտադիտարկում անցկացնելով, ապա վերջին մի քանի տարում դա բավարար չէ»,- ընդգծել է Բաբայանը՝ հավելելով, որ նշված գործընթացում կարեւորագույն դերերից մեկը լինելու է Լեռնային Ղարաբաղի Հանրապետությանը։
Հիշեցնենք, որ ավելի վաղ հայտնել էինք, որ Հայաստանի նախագահ Սերժ Սարգսյանը մայիսի 16-ին աշխատանքային այցով կժամանի Վիեննա, որտեղ մի շարք հանդիպումներ կունենա ԵԱՀԿ ՄԽ համանախագահների նախաձեռնությամբ։
