Թուրքիա կատարած վերջին այցի ընթացքում Գերմանիայի կանցլեր Անգելա Մերկելը նախագահ Ռեջեփ Թայիփ Էրդողանի հետ զրույցի ընթացքում խստացրել է տոնը, գրում է գերմանական Die Welt պարբերականի վերլուծաբան Ռոբին Ալեքսանդրը։
Մերկելը դարձյալ խստացրել է տոնն Էրդողանի հետ հանդիպման ընթացքում. Die Welt-ի անդրադարձը
ՍՏԵՓԱՆԱԿԵՐՏ, 25 մայիսի, ԱՐՑԱԽՊՐԵՍ: Հոդվածի հեղինակը հիշեցնում է, որ ավելի վաղ՝ միգրացիոն ճգնաժամի ընթացքում, Մերկելը խուսափում էր Էրդողանի հասցեին ցանկացած քննադատությունից։
Մասնավորապես, Մերկելի լուրջ տրամադրվածության մասին է վկայում հայտարարությունն այն մասին, որ Թուրքիայի քաղաքացիների համար հուլիսի մեկից վիզաների ոչ մի չեղարկում չի լինելու։
«Ներկա դրությամբ ոչ բոլոր պայմաններն են իրականացվում»,-հայտարարել է Մերկելը։
Նա, սակայն, խուսափել է պատասխանել հարցին, թե չի՞ հանգեցնի դա Թուրքիայի և Եվրամիության միջև փախստականների հարցով համաձայնագրի տապալմանը։
«Մենք խոսեցինք միայն մակերեսորեն և չքննարկեցինք բոլոր մանրամասները»,-ասել է կանցլերը՝ հավելելով, որ իր մոտ տպավորություն է, որ համաձայնագիրը բխում է երկու կողմերի շահերից, և այն պետք է աստիճանաբար իրագործել։
Պարբերականը հիշեցնում է, որ խոսքը Թուրքիայի և ԵՄ-ի միջև կնքված համաձայնագրի մասին է, համաձայն որի Թուրքիան խոստացել է թույլ չտալ Էգեյան ծովով փախստականների մուտքը Եվրոպա, ինչի դիմաց Եվրոպան պետք է չեղարկի վիզային ռեժիմը Թուրքիայի համար։ Վերջինս, իր հերթին, պետք է տեխնիկական ու քաղաքական բնույթի 72 հարց կարգավորի։ Հենց վերջինն էլ Էրդողանն անել չի ցանկանում. հակաահաբեկչական օրենսդրությունը, որով Թուրքիան հետապնդում է ընդդիմադիրների, լրագրողների ու պատգամավորների, անփոփոխ է մնալու, գրում է հեղինակը։