Երեկ՝ նոր ուսումնական տարվա նախաշեմին, լրագրողներին մամլո ասուլիսի է հրավիրել ԼՂՀ կրթության և գիտության նախարար Սլավա Ասրյանը:
Նոր ուսումնական տարին Արցախում կրթության ոլորտի հերթական բարեփոխումների շրջան կհանդիսանա
Երեկ՝ նոր ուսումնական տարվա նախաշեմին, լրագրողներին մամլո ասուլիսի է հրավիրել ԼՂՀ կրթության և գիտության նախարար Սլավա Ասրյանը:
Ներածական խոսքում նախարարը հավաստիացրեց, որ Արցախի բոլոր հանրակրթական դպրոցները պատրաստ են աշակերտներին ընդունել, նույնիսկ արդեն մեկնարկել են ձմռան նախապատրաստական աշխատանքները:
Ինչպես հաղորդում է «Արցախպրես»-ը, նախարարը հայտարարել է, որ 2014-2015 ուսումնական տարին Արցախի կրթության ոլորտի համար կնշանավորվի որպես կրթության հերթական բարեփոխումների շրջան։ Այս օրերին՝ ավանդական օգոստոսյան խորհրդակցությունների ընթացքում, նա հանդիպումներ է ունենում բոլոր շրջանների մանկավարժների հետ՝ քննարկելով նախորդ ուսումնական տարվա արդյունքները և կանխանշելով առաջիկա ուսումնականում կրթական համակարգի անելիքները։
Խոսելով կրթության ոլորտի բարեփոխումների մասին, նախարարը նշեց, որ այն տևական գործընթաց է, որի ավարտը պետք չէ սահմանել։ «Մեր հանրապետությունում գործում է կայուն կրթական համակարգ՝ սկսած նախադպրոցական օղակից մինչև բարձրագույն մասնագիտական ուսումնական հաստատություն, և յուրաքանչյուր աստիճանում մեր կողմից իրականացվող պետական քաղաքականությունը նպատակաուղղված է նրան, որպեսզի կրթության համակարգն ապրի զարգացման այն աստիճանը, որն անհրաժեշտ է մեր երկրի, ժաղովրդի բարեկեցիկ կյանքի ու հետագա զարգացման համար»,- ասաց Ս. Ասրյանը։
