Ադրբեջանի զինված ուժերը հունիսի 19-24-ին զորքերի կառավարման մարմինների, զորամիավորումների եւ զորամասերի հետ օպերատիվմարտավարական զինավարժանքներ է սկսում:
Ադրբեջանական բանակը խոշորամասշտաբ զինավարժություններ է սկսում
ՍՏԵՓԱՆԱԿԵՐՏ, 17 հունիսի, ԱՐՑԱԽՊՐԵՍ-ԱՐՄԵՆՊՐԵՍ: Ադրբեջանի պաշտպանության նախարարության մամուլի ծառայության տարածած հաղորդագրությունում նշվում է, որ «զինավարժանքներին կմասնակցեն անձնակազմի 25 հազար զինծառայողներ, 300-ից ավելի միավոր տանկեր եւ զրահապատ մարտական մեքենաներ, 100-ից ավելի հրթիռային եւ հրետանային սարքավորումներ, մինչեւ 40 ռազմական ավիացիա եւ 30-ից ավելի հակաօդային պաշտպանության համակարգեր, ռազմածովային ուժերի նավերի միավորումներ եւ հատուկ նշանակության զորամասեր»:
Զինավարժանքների համար շրջաններ են որոշվել մերձճակատային գոտու եւ Նախիջեւանի ինքնավար հանրապետության հրաձգարանները, ինչպես նաեւ Կասպից ծովի ադրբեջանական հատվածը:
«Զինավարժանքների գլխավոր նպատակը հանդիսանում է զորքերի եւ մարտական համակարգերի կառավարման մեջ զորամիավորումների եւ միավորների հրամանատարության հմտությունների կատարելագործումը, ինչպես նաեւ բարդ պայմաններում ժամանակակից համաբանակային մարտի անցկացման մեջ մարտական ներդաշնակեցման ու մարտական էլեմենտների փոխգործողությունների մակարդակի բարձացումը»,- նշվում է հաղորդագրությունում:
Նշվում է նաեւ, որ տվյալ զինավարժանքների առաձնահատկությունները կայանում են նրանում, որ դրանք անցկացվելու են սպառազինման մեջ առկա նոր տեխնոլոգիական միջոցների ու սպառազինության կիրառմամբ` «հաշվի առնելով պայմանական հակառակորդի ուժեղ պաշտպանության համակարգը»: