Այսօր Ստեփանակերտօի Ստեփան Շահումյանի անվան օղակաձև պուրակում տեղի է ունեցել ձեռքի աշխատանքների ցուցահանդես-վաճառք՝ ԼՂՀ մշակույթի և երիտասարդության հարցերի նախարարության նախաձեռնությամբ։
Ձեռքի աշխատանքների ցուցահանդես-վաճառք Ստեփանակերտում (լուսանկարներ)
Այսօր Ստեփանակերտօի Ստեփան Շահումյանի անվան օղակաձև պուրակում տեղի է ունեցել ձեռքի աշխատանքների ցուցահանդես-վաճառք՝ ԼՂՀ մշակույթի և երիտասարդության հարցերի նախարարության նախաձեռնությամբ։
«Արցախպրես»-ի հաղորդմամբ՝ ԼՂՀ մշակույթի և երիտասարդության հարցերի փոխնախարար և «Արցախյան գորգարվեստ» մրցույթի հանձնաժողովի նախագահ Լեռնիկ Հովհաննիսյանը պատվոգրեր և դրամական պարգևներ է հանձնել մրցույթի տարբեր անվանակարգերում հաղթող ճանաչված մասնակիցներին։
Լ. Հովհաննիսյանի խոսքով՝ այս տարվա գարնանը հայտարարված էր «Արցախյան գորգեր» և «Իմ տոհմածառը» անվանակարգերով մրցույթներ՝ առանց տարիքային սահմանափակումների (11-62 տարեկանները)։ Մրցույթին մասնակցել են Արցախի բոլոր շրջանների ներկայացուցիչները, մանավանդ բավականին ակտիվ էր վերաբնակեցվող Քաշաթաղի շրջանը։
«Մենք նպատակ ենք ունեցել վերականգնել Արցախի մշակութային ավանդույթները։ Մեր հիմնական պահանջը եղել է այն, որ գորգերը լինեն արցախյան նախշազարդերով. չէ՞ որ Արցախը ժամանակին եղել է հայոց գորգագործական կենտրոններից մեկը։ Այսօր էլ Արցախը նորից վերադառնում է իր արմատներին՝ այնտեղից պեղելու համար մերը՝ ազգայինը։ ԼՂՀ մշակույթի և երիտասարդության հարցերի նախարարությունը քայլեր է ձեռնարկում՝ այդ կարևորագույն ճյուղը վերականգնելու ուղղությամբ։ Այս մրցույթն էլ հենց ուղված է դրան»,-հավելել է Լ. Հովհաննիսյանը։
Նշենք, որ մրցույթին ներկյացվել էր 24 գորգ, 23 կարպետ, 24 ասեղնագործ գորգ և 8 գոբելեն։
Նմանատիպ մրցույթները լինելու են շարունակական։
