Հռոմի պապի Հայաստան կատարած այցն առանձնահատուկ նշանակություն ունի պատերազմից փախած սիրիահայերի համար:
Հռոմի պապի այցը հատուկ նշանակություն ունի սիրիահայերի համար.The Associated Press
ՍՏԵՓԱՆԱԿԵՐՏ, 28 հունիսի, ԱՐՑԱԽՊՐԵՍ: The Associated Press-ում հրապարակված հոդվածում այս մասին գրել է Ավետ Դեմուրյանը:
Խաղաղության մասին խոսքերը կարեւոր են 35-ամյա Անգելա Աղեմյանի եւ նրա երեք երեխաների համար: «Մեզ համար խաղաղությունն ամենակարեւոր բանն է: Մեր ընտանիքում տիրող խաղաղությունը կորսված է»,- Երեւանում պարբերականի թղթակցի հետ զրույցում ասաց Անգելան: «Իսլամական պետության» զինյալներն Անգելայի ամուսնուն սպանել են այն բանի համար, որ չի հրաժարվել քրիստոնեական հավատքից: Երեք երեխաների մայրը մտադիր չէ Սիրիա վերադառնալ, չնայած Հալեպում տուն ունի, նաեւ ծնողներն են մինչեւ հիմա այնտեղ ապրում:
Ըստ հեղինակի, Հայաստանը բազմաթիվ տնտեսական մարտահրավերների առջեւ է կանգնած, բայց «սիրիացի փախստականները հավաստում են, որ ամենաշատը գնահատում են այն ջերմ ընդունելությունը, որին արժանացել են»: Չնայած երկրում տիրող գործազրկության բարձր մակարդակին՝ Ավետ Դեմուրյանը խոստովանում է, որ Սիրիան լքած հայերը կարողացել են աշխատանք գտնել որպես բժիշկ, ոսկերիչ, մեխանիկ, վարսահարդար, խոհարար:
Անգելան ասում է՝ տորթ ու կարկանդակներ է թխում եւ շատ անվտանգ զգում իրեն Հայաստանում:
