Չնայած հունիսի 2-ի ՀՀ կառավարության նիստում ծախսերի խնայողության անցնելու կոնտեքստում վարչապետ Հովիկ Աբրահամյանը հայտարարեց, որ գործադիր մարմինն այսուհետ կամրագրի նվազագույն արժեք ունեցող ավիատոմս կամ դրա նկատմամբ մինչև 8 տոկոս տարբերություն ունեցողը և մեկնելու են միայն «էկոնոմ» կարգով, օրեր անց՝ հունիսի 14-ին, ՀՀ պաշտպանության նախարար Սեյրան Օհանյանի համար Պաշտպանության նախարարությունը 965 հազար դրամով բիզնես կլասի 1 տոմս է գնել՝ Մոսկվա երկօրյա այցի համար:
965 000 դրամով Սեյրան Օհանյանի համար Երևան-Մոսկվա բիզնես կլասի տոմս է գնվել՝ չնայած վարչապետի հորդորին
ՍՏԵՓԱՆԱԿԵՐՏ, 28 հունիսի, ԱՐՑԱԽՊՐԵՍ: Կառավարության նույն նիստում վարչապետ Հովիկ Աբրահամյանը հայտարարել էր. «Առաջարկությունը հիմնավոր է և անհրաժեշտ է կատարել այդ փոփոխությունը, հայտնում է թերթ.ամ-ը:
Այս ուղենիշները չեն տարածվում միայն հանրապետության Նախագահի, Ազգային ժողովի նախագահի և վարչապետի գործուղումների վրա»:
Իսկ դեռ անցյալ տարվա դեկտեմբերի նիստում ներկայացնելով ուղևորությունների նոր կարգը, կառավարության աշխատակազմի ղեկավար–նախարար Դավիթ Հարությունյանն ասել էր, որ էկոնոմ դասի տոմսերով կգործուղվեն նաև նախարարները, բացառությամբ այն դեպքերի, երբ թռիչքի տևողությունը 8 ժամից ավելի է:
Tert.am-ը պաշտպանության նախարարի մամուլի խոսնակ Արծրուն Հովհաննիսյանին հարց ուղղեց, թե ինչու է հունիսի 14-16-ի համար ՊՆ-ն Երևան-Մոսկվա-Երևան բիզնես կլասի 1 տոմս գնել 965 հազար դրամով, այն դեպքում, երբ վարչապետը հորդորել է օգտվել միայն էկոնոմ կլասից:
Այդ առթիվ ՊՆ-ից հետևյալ պատասխանն են ուղարկել. «Ավիատոմսերի գնման նոր համակարգի փորձարկման և գնումների գործընթացի կազմակերպման մասին» ՀՀ կառավարության որոշման Ձեր ներկայացրած ուղենիշները չեն տարածվում ՀՀ նախագահի, ԱԺ նախագահի և վարչապետի գործուղումների վրա: ՀՀ ազգային անվտանգության խորհրդի մյուս անդամների գործուղումների դեպքում ձեռք է բերվում համակարգում առկա նվազագույն արժեք ունեցող ավիատոմսը՝ առանց կարգի և երթուղու ընտրության սահմանափակման: ՀՀ Պաշտպանության նախարար Սեյրան Օհանյանի համար ձեռք է բերվել Երևան-Մոսկվա-Երևան բիզնես կարգի տոմս, քանի որ տվյալ պահին այլ տոմսեր համակարգում չեն եղել: Գնումը կատարվել է համաձայն կարգի: Բացի վերոնշյալ խնդրից, կոնկրետ օդանավակայանի, ուղղության և ժամի առումով ՀՀ ՊՆ-ն ունեցել է ավիատոմսերի միջև ընտրություն կատարելու սահմանափակ հնարավորություն, ինչն էլ ենթադրում է ավիատոմսի գնի թանկություն»:
Նկատենք սակայն, որ կառավարության նիստում էկոնոմ կլասից օգտվելու վարչապետի հորդորը վերաբերում էր բոլոր նախարարներին:
Բացի դա, ՊՆ-ն նույն գործուղման համար գնել է նաև Երևան-Մոսկվա-Երևան 3 էկոնոմ կլասի տոմս և դրանք գնվել են 270 հազարով, շուկայականից էական թանկ գնով: «Ինչ վերաբերում է Երևան-Մոսկվա-Երևան էկոնոմ կարգի տոմսերի գնին, ապա հրավիրող կողմը հստակ նշել է ինչպես օդանավակայանը, այնպես էլ դիմավորման ժամը, ինչի հետևանքով, կրկին, ՀՀ ՊՆ-ն ունեցել է ավիատոմսերի միջև ընտրություն կատարելու սահմանափակ հնարավորություն»,- ասված է ՊՆ պատասխանի մեջ:
Մեկ այլ դեպքում ՊՆ-ն 332 հազար դրամով Աստանա-Մոսկվա-Երևան ուղղությամբ 2 տոմս է գնել երեխաների համար: Tert.am-ը հետաքրքրվել էր, թե ում երեխաների համար են գնվել այդ տոմսերը և ինչու պետբյուջեի հաշվին:
«Համաձայն կարգի, ՀՀ ռազմական ակադեմիաներում սովորող սպաների ընտանիքի անդամների համար ավիատոմսերը գնում է ՀՀ ՊՆ-ն: Ձեր ներկայացրած երկու երեխաները եղել են սպաների զավակները, և նրանց համար տոմսերի գնումը կատարվել է համաձայն գործող կարգի»,- պատասխանել է ՊՆ խոսնակը՝ չբացահայտելով, թե որ սպաների երեխաների մասին է խոսքը: