ՄԱԿ Անվտանգության խորհուրդը Լիբանանին կոչ է արել անհետաձգելիորեն երկրի նախագահ ընտրել. այդ պաշտոնը թափուր է ավելի քան 2 տարի
ՄԱԿ Անվտանգության խորհուրդը Լիբանանին կոչ է արել անհապաղ երկրի նախագահ ընտրել
ՍՏԵՓԱՆԱԿԵՐՏ, 22 հուլիսի, ԱՐՑԱԽՊՐԵՍ: Այս մասին տեղեկացնում է «ՌԻԱ Նովոստի»–ն։
Երկիրը քաղաքական ճգնաժամի մեջ է հայտնվել պետության նախկին ղեկավար Միշել Սուլեյմանի պաշտոնավարման ավարտից հետո՝ 2014-ին։ Լիբանանի սահմանադրության համաձայն՝ նախագահ կարող է դառնալ միայն մարոնի քրիստոնյա, որին ընտրում է խորհրդարանը։ Պետության ղեկավարի ընտրությունները երկրում հետաձգվում են արդեն 41-րդ անգամ։ Ավելի վաղ նախագահի ընտրությունները նշանակվել էին օգոստոսի 8-ին։
«Նախագահի ընտրությունը, միասնության կառավարության ձեւավորումը եւ 2017-ի մայիսին խորհրդարանական ընտրությունների անցկացումը վճռորոշ նշանակություն ունի Լիբանանի կայունության եւ տարածաշրջանային մարտահրավերներին դիմակայելու համար»,– ասված է հուլիսի 22-ին ընդունած հայտարարության մեջ։
ԱԽ–ն նորից կոչ է արել բոլոր լիբանանցի առաջնորդներին նախաձեռնողականություն եւ ճկունություն ցուցաբերել, որպեսզի անհետաձգելիորեն խորհրդարանական նստաշրջան հրավիրվի եւ մեկնարկի նախագահի ընտրությունների գործընթացը։
ԱԽ անդամները նշել են, որ քաղաքական կաթվածն ուղղակիորեն ազդում է Լիբանանի ունակության վրա՝ լուծել անվտանգության, տնտեսության, սոցիալական եւ մարդասիրական ոլորտում աճող խնդիրները։
