Ընթացիկ տարվա առաջին կիսամյակում հանրապետությունում գրանցված հանցագործությունների ընդհանուր թիվը աճել է 80,1%-ով կամ 161 դեպքերով (2015թ.՝ 201, 2016թ.՝ 362):
Հանրապետությունում գրանցված հանցագործությունների թիվն աճել է
ՍՏԵՓԱՆԱԿԵՐՏ, 28 հուլիսի, ԱՐՑԱԽՊՐԵՍ: ԼՂՀ ոստիկանության մամլո ծառայության փոխանցմամբ` այս մասին գերատեսչության կոլեգիայի նիստում հայտնել է ԼՂՀ ոստիկանության պետի առաջին տեղակալ Անդրանիկ Հակոբյանը՝ ներկայացնելով ընթացիկ տարվա առաջին կիսամյակի օպերատիվ-ծառայողական գործունեության ամփոփ արդյունքները:
Աղբյուրի հաղորդմամբ՝ հանցագործությունների ընդհանուր թվի աճը հիմնականում պայմանավորված է սույն թվականի հունվարի 1-ից դիմողի բողոքի բացակայության և տուժողը կասկածյալի կամ մեղադրյալի հետ հաշտվելու հիմքերով կարճված քրեական գործերով և մերժված նյութերով հանցագործությունների հաշվառմամբ, ինչպես նաև թմրամիջոցների, զենք և ռազմամթերքի ապօրինի շրջանառության դեպքերի հայտնաբերման և բացահայտման ակտիվ աշխատանքներով։
Հաշվետու կիսամյակում 10.000 բնակչին բաժին ընկնող հանցագործությունների թիվը հանրապետությունում կազմել է 24,3 (2015թ.՝ 13,5)։
Ի դեպ, վերը նշված հիմքերով կարճված քրեական գործերով և մերժված նյութերով հաշվառված հանցագործությունները կազմել են 121 դեպք, որոնց տեսակարար կշիռը բոլոր գծերով գրանցված հանցագործություններում կազմել է 33,4%։
Հանցագործությունների աճի պարագայում բարելավվել է նաև բոլոր ուղղություններով դրանց բացահայտման արդյունավետությունը։
Հաշվետու ժամանակահատվածում գրանցված 362 հանցագործություններից բացահայտվել է 316-ը, նախորդ տարվա նույն ժամանակահատվածի՝ 201-ից 133-ի դիմաց։ Բացահայտվել է նաև նախկին տարիներին կասեցված հանցագործության 9 դեպք (2015թ.՝ 7)։
