Այսօր Թեհրանի հայ համայնքի կողմից հրատարակվող «Ալիք» օրաթերթը տոնում է իր հիմնադրման 85-րդ տարեդարձը:
«Արցախպրես»-ը շնորհավորում է սփյուռքահայ գործընկերներին` Թեհրանի «Ալիք» օրաթերթի հիմնադրման 85-ամյակի առթիվ
ՍՏԵՓԱՆԱԿԵՐՏ, 17 սեպտեմբերի, ԱՐՑԱԽՊՐԵՍ: Սփյուռքահայ մամուլը ընդհանրապես, բացի մասնագիտական աշխատանքներ կատարելուց, մեծ հայրենանվեր առաքելություն ունի հայապահպանության գործում: Այն օտար երկրներում հաստատված հայ ընտանիքների համար մայրենի լեզվի ու մշակույթի հետ հաղորդակցվելու բացառիկ հնարավորություն է ընձեռում: Այս առումով Թեհրանի հայության և առհասարակ իրանահայ համայնքի համար անցած 85 տարիներին բացառիկ դերակատարություն է ունեցել «Ալիք» օրաթերթը, որն այսօր էլ շարունակում է ամենապահանջված լրատուն մնալ:
Տարեդարձի առթիվ «Արցախպրես» լրատվական գործակալության ողջ աշխատակազմը շնորհավորում է Թեհրանի «Ալիք» օրաթերթի իր գործընկերներին և նրա գլխավոր խմբագիր Դերենիկ Մելիքյանին՝ թերթի հիմնադրման 85-ամյակի առթիվ և մաղթում ստեղծագործական նորանոր հաջողություններ: Ի դեպ գործընկերների հրավերով «Ալիք» օրաթերթի 85-ամյակի գլխավոր տոնակատարությանը մասնակցելու համար Թեհրանում է նաև «Արցախպրես» լրատվական գործակալության տնօրեն Վահրամ Պողոսյանը:
«Ալիք»-ը հրատարակվում է 1931 թ. մարտի 22-ից Թեհրանում` սկզբում որպես շաբաթաթերթ, 1935 թ.-ից` երկօրյա, իսկ 1941 թ.-ից` որպես օրաթերթ. այն 1965 թ.-ից լույս է տեսնում 8 էջով։ Թերթը հրատարակվել է առանց դադարի, միայն 1979 թ. Հունվարին` Իրանի հեղափոխության հաղթանակի նախօրյակին, մասնակցելով համաիրանական մամուլի գործադուլին, շուրջ 40 օր դադարել է հրատարակվելուց։ Ունի Հայ հեղափոխական դաշնակցության գաղափարա-քաղաքական ուղղվածություն և իր բովանդակության առանցքն է կազմում Հայ դատի հետապնդումը։ Են որ ամենագլխավորն է, իրականացնում է հայ ժողովրդի բովանդակ շահերի պաշտպանությունը և իրանահայ համայնքի հայեցի դիմագծի պահպանումը։ Ունի իր սեփական տպարանը և խմբագրատան շենքը։ Հրատարակում է նաև իրանահայ դպրոցների դասագրքեր, հայերեն ու պարսկերեն գրքեր և տպագրական այլազան պատվերներ։ Բազմիցս մասնակցել է Իրանի մամուլի ցուցահանդեսներին։
Ներկայումս տպագրվում է 4350 տպաքանակով և ունի բաժանորդներ թե Իրանի հայահոծ քաղաքներում և թե սփյուռքի զանազան գաղթօջախներում։ 2001 թ. հունվարի 23-ից «Ալիք»-ը տեղադրվում է նաև համացանցի վրա։ 2004 թ.-ի մարտից օրաթերթը խմբագրում է Դերենիկ Մելիքյանը։
