Այսօր Ադրբեջանում անցկացվող սահմանադրական հանրաքվեի ընթացքն իսկ վկայում է Ադրբեջանում ժողովրդավարության ավարտի մասին։
Կներվի՞ Ալիևին իր Սահմանադրության անցկացումը՝ բարդ է ասել, Ադրբեջանը վերին աստիճանի կարևոր ռուբիկոն է անցնում. քաղաքագետ
ՍՏԵՓԱՆԱԿԵՐՏ, 26 սեպտեմբերի, ԱՐՑԱԽՊՐԵՍ: Ստյոպա Սաֆարյանի գնահատմամբ` սա նաև այն պատճառով, որ ալիևյան նոր Սահմանադրությունը բացարձակ հետադիմական է և Ադրբեջանին ուղղակի տանում–մտցնում է Կենտրոնասիական պետության զարգացման այնպիսի մոդելի մեջ, որի պատճառով անգամ հետագայում Ադրբեջանից ժողովրդավարություն ակնկալելը դառնում է անիմաստ:
Այս մասին Tert.am –ի հետ զրույցում նշեց քաղաքագետ Ստյոպա Սաֆարյանը` նկատելով,, որ այս իմաստով պատահական չէ ինչպես Վենետիկի հանձնաժողովի չափազանց կոշտ հայտարարությունը, այնպես էլ դրան Ադրբեջանի նախագահականի «հիստերիկ արձագանքը»:
Հիշեցնենք, որ Ադրբեջանում նախատեսված 29 փոփոխվող դրույթներից մեկն էլ նախագահի պաշտոնավարման ժամկետը 5-ից 7 տարի դարձնելն է: Ադրբեջանական ընդդիմության գնահատմամբ` սա բացառապես հետապնդում է նախագահ Իլհամ Ալիևին հավերժ միապետ դարձնելու ու հետագայում` իշխանությունը հորից որդուն փոխանցելու ալիևյան գերդաստանի ավանդույթը շարունակելու նպատակ: Հիշեցնենք նաև, որ ԵԽ Վենետիկի հանձնաժողովը և միջազգային հեղինակավոր մի շարք այլ կառույցներ դատապարտել են ալիևյան հանրաքվեի անցկացումը:
Ստյոպա Սաֆարյանը, նախ, առաջարկեց հասկանալ, որ Ադրբեջանի գործող նախագահը այդ սահմանադրական փոփոխությունները նախաձեռնել է իր իշխանությունն իր ժառանգին փոխանցելու համար, ինչը չի կարող վրիպել միջազգային կառույցների ուշադրությունից։ Իսկ Եվրոպայի խորհրդի ու ԵԱՀԿ անդամ պետությունում չի կարող ողջունվել նման կարգի սահմանադրական փոփոխությունը:
Այնպես որ, քաղաքագետը, պատասխանելով հարցին, թե կներվի՞ այս Սահմանադրության անցկացումն Իլհամ Ալիևին, առաջարկեց սպասել ու տեսնել` ինչ սցենարներ կլինեն:
«Այս պահին շատ բարդ է պատասխանել այդ հարցին, որովհետև Ադրբեջանն իսկապես վերին աստիճանի կարևոր ռուբիկոն է անցնում, և Արևմուտքի համար իսկապես կարևոր է լինելու ի նկատի ունենալ այն, որ անդառնալի զարգացումներ են ընթանում Ադրբեջանում: Հետևաբար, կա՛մ այժմ հարցը կտրուկ կդրվի, և Ադրբեջանի նկատմամբ կկիրառվեն կտրուկ պատժամիջոցներ, որովհետև հետո արդեն ուշ կլինի, կա՛մ նավթային և այլ շահերը կարևոր կլինեն և, հետևաբար, ժողովրդավարությունը կզոհաբերվի»,-ասաց Ստյոպա Սաֆարյանը:
Ըստ նրա՝ այստեղ խնդիրը միայն նավթային շահերը չեն, այլև այն, որ պատժամիջոցների տակ դրվելիք Ադրբեջանը կարող է ավելի արագ հայտնվել Ռուսաստանի հովանու ներքո:
Մյուս կողմից էլ՝ Ադրբեջանին չպատժելու հարցում որոշակի դեր կարող է ունենալ Ղարաբաղյան հակամարտությունը:
«Ոչ թե այն, որ բանակցային պրոցեսը պետք է սկսել զրոյից, ինչի մասին հարցրեցիք, այլ այն, որ նման սցենարների դեպքում Ադրբեջանն իսպառ կարող է տապալել բանակցային գործընթացը, հրաժարվել Մինսկի խմբից, ԵԱՀԿ-ից, ինչն Արևմուտքի համար ոչ պակաս վտանգավոր է, քան Ռուսաստանի գիրկն ընկնելը»,- ավելացրեց քաղաքագետը:
