Մուրացանյան օրերն Արցախում ծրագրի շրջանակներում այսօր Ստեփանակերտի Գրիգոր Նարեկացի համալսարանի դահլիճում կայացել է Լոս Անջելեսում բնակվող հայ գրականագետ-մատենագետ, թարգմանիչ, հրապարակախոս, Հայաստանի գրողների միության անդամ, ազգային - հասարակական գործիչ, Կալիֆորնիայի գրողների միության փոխնախագահ Հովսեփ Նալբանդյանի հովանավորությամբ հրատարակված «Բառը սահմանի վրա» գրքի շնորհանդեսը` նվիրված ԼՂՀ անկախության 25-ամյակին:
Ստեփանակերտում կայացել է գրքի շնորհանդես` նվիրված ԼՂՀ անկախության 25-ամյակին
ՍՏԵՓԱՆԱԿԵՐՏ, 27 սեպտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ` շնորհանդեսին բացման խոսքով հանդես է եկել Գրիգոր Նարեկացի համալսարանի ռեկտոր, Արցախի գրողների միության նախագահ Վարդան Հակոբյանը՝ նշելով, որ «Բառը սահմանի վրա» գրքում տեղ են գտել Արցախի գրական ընտանիքի տարբեր սերունդների ներկայացուցւչների գեղարվեստական գործեր` արձակ և չափածո, ինչպես նաև արցախյան բանահյուսության նմուշներ:
Հովսեփ Նալբանդյանը նշել է, որ իր համար մեծ պատիվ է լինել Արցախում: «Ինձ համար գիրք կարդալը, հրատարակելը հիմնական աշխատանք է: Ես ունեմ բավականին մեծ գրադարան 5300 հատոր` 8 լեզուներով, որն ամեն տարի 250-300-ով ավելանում է: Պետք է կարողանալ «Բառը սահմանի վրա» գիրքը ներկայացնել ու տարածել աշխարհով մեկ»,-ասել է Հ. Նալբանդյանը և ընդգծել, որ ինքը շուրջ 16 տարում հրատարակել է 32 գիրք:
«Այո, 32 գիրք, ավելի քան 25 հազար տպաքանակով:Հայկական մշակույթի զարգացման և պահպանման գծով դեռևս շատ գործ կա իրականացնելու: Ամեն մի գիրք, որ լույս է տեսնում, իմ հոգին ու էությունը լցվում է հպարտությամբ և ուրախությամբ»,-ասել է Հ. Նալբանդյանը:
«Բառը սահմանի վրա» գիրքը կազմել և խմբագրել է արցախցի երիտասարդ գրող Սոնա Համբարձումյանը, ով շնորհակալություն հայտնելով գրքի հովանավորներ Հովսեփ և Կարոլինա Նալբանդյաններին, իր խոսքում մասնավորապես ասել է. «Յուրաքանչյուր խոսքի մեջ կարելի է գտնել զանազան աշխարհայացքներ, տարբեր մտածողությունների հսկայական կառուցվածք: «Բառը սահմանի վրա» գրքի վերնագիրը հարուստ բովանդակություն ունի: Արցախում ստեղծված գրականությունը արցախցու բնավորության և կամքի զորության լավագույն արտահայտիչն է: Մենք լինելով արցախցի ընդունակ ենք աշխարհին ներկայացնելու մեծանուն գրողներ և բովանդակալից գրականություն»:
Հ. Նալբանդյանը Վ. Հակոբյանի կողմից պարգևատրվել է դիպլոմով և արժանացել Գրիգոր Նարեկացի համալսարանի պատվավոր դոկտորի կոչմանը:
Միջոցառմանը ներկա էին ԼՂՀ գրողների միության անդամներ, ովքեր հանդես են եկել ելույթներով:
