Այսօր Հալեպում կա 8-10 հազար հայ:
21 հալեպահայ է ժամանելու Հայաստան
ՍՏԵՓԱՆԱԿԵՐՏ, հոկտեմբերի 13, ԱՐՑԱԽՊՐԵՍ: Ճշգրիտ թիվ չենք կարող տրամադրել, քանի որ ճշգրիտ հաշվարկ անելու հնարավորություն չկա: Թիվը մեզ տրամադրում է տեղի ազգային կառույցները, Սիրիայի խորհրդարանի պատգամավոր Ժիրայր Ռեիսյանը,- Panorama.am-ի փոխանցմամբ՝ լրագրողների հետ հանդիպման ժամանակ ասաց ՀՀ սփյուռքի նախարարի տեղակալ Սերժիկ Սրապիոնյանը:
Նա նշեց, որ նախարար Հրանուշ Հակոբյանը վերջին անգամ Ռեիսյանի հետ խոսել է երեկ՝ 22:30-ին. «Նա ասել էր՝ այս պահին հայկական թամաղասերի ուղղությամբ խաղաղություն է, պայթյուններ, հրաձգություն չկա, իմ ընկերների հետ խաղաղ անկյունում նստած սուրճ եմ խմում»:
Ս. Սրապիոնյանը տեղեկացրեց, որ Հալեպից հոկտեմբերի 17-ին սպասում են 21 հոգիանոց խմբի վերադարձի, երեք ընտանիքի անդամներ են: Ս. Սրապիոնյանը նաև նշեց, որ երկու օր առաջ դիմավորել են մեկ ընտանիքի 4 հոգիանոց խմբի:
«Մենք հիմա էլ օդանավակայանում հերթապահ խումբ ունենք: Նրանք տեղեկանում են, թե որ ինքնաթիռի մեջ սիրիահայեր կան, դիմավորում են, տեղափոխում ժամանակավոր կացարաններ՝ հարցին վերջնական լուծում տալու համար»,- ասաց ՀՀ սփյուռքի նախարարի տեղակալը:
