Այսօր Արցախի պետական համալսարանում տեղի է ունեցել առաջին կուրսեցիների երդման արարողությունը:
Առաջին կուրսեցիների երդման արարողություն՝ ԱրՊՀ-ում (լուսանկարներ)
Այսօր Արցախի պետական համալսարանում տեղի է ունեցել առաջին կուրսեցիների երդման արարողությունը:
Ինչպես հաղորդում է «Արցախպրես»-ը, ուսանողների երդմնակալությանը ներկա էին ԼՂՀ Կրթության և գիտության նախարար Սլավա Ասրյանը, ԱրՊՀ ռեկտոր Մանուշ Մինասյանը, Շուշիի Ս. Ամենափրկիչ (Ղազանչեցոց) եկեղեցու հոգևոր հովիվ Տեր Անդրեաս քահանա Թավադյանը, համալսարանի պրոֆեսորա-դասախոսական անձնակազմը, համալսարանականներ, հյուրեր, ծնողներ։
Մինչ միջոցառումը՝ ներկաները ծաղիկներ դրեցին Արցախյան ազատամարտում ԱրՊՀ զոհված ուսանողների հիշատակը հավերժացնող հուշաքարին, որի մոտ էլ անցկացվեց երդման արարողությանը։
Հնչեց ԱրՊՀ օրհներգը, որին հաջորդեց հաստատության ռեկտորի բացման խոսքը: Այսօրվա խորհուրդը, մասնավորապես ասաց նա, տարիների պատմություն ունի. սա մեր կրթօջախի լավագույն ավանդույթներից մեկն է, և բոլորս հավաքվել ենք նշանավորելու առաջին կուրսեցիների մուտքն Արցախի մայր բուհ։
Մ. Մինասյանը նշեց. «Ուսանողները, երդվելով նվիրվել ուսմանը, պետք է մշտապես հիշեն, որ առաջնակարգ, բարձր պատրաստվածության մասնագետ լինելը դարի պահանջն է, օրվա հրամայականը»։
Ներկաներին ողջույնի և շնորհավորանքի խոսքով դիմեց նաև ԿԳ նախարարը: «Մենք չենք կասկածում, որ տարեցտարի համալսարան է գալիս այնպիսի ուսանողություն, որն ի սկզբանե տրամադրված է սովորելու և տիրապետելու խորը մասնագիտական գիտելիքների։ Համոզված եմ, որ պրոֆեսորա- դասախոսական կազմը ջանք ու եռանդ չի խնայի իրենց գիտելիքները փոխանցելու ձեզ»,- ասաց Ս.Ասրյանը։
Այնուհետև շնորհավորանքի և ողջույնի խոսքով հանդես եկավ ԱրՊՀ ուսումնական գծով պրոռեկտոր Գեորգի Սահակյանը:
Ապա տեղի ունեցավ բուն երդման արարողությունը: Առաջին կուրսեցիներին հանձնվեցին ուսանողական տոմսերն ու ստուգարքային գրքույկները։
Տեր Անդրեասը, շնորհավորելով առաջին կուրսեցիներին, օրհնեց երդման արարողությունը։
