Արցախի Հանրապետության Ազգային ժողովի խոսնակ, ԼՂՀ նախագահին առընթեր սահմանադրական բարեփոխումների մասնագիտական հանձնաժողովի նախագահ Աշոտ Ղուլյանն այսօր Սահմանադրության նախագծի հանրային քննարկումների շրջանակներում հանդիպել է դատական համակարգի ներկայացուցիչներին:
Նոր Սահմանադրության ընդունումից հետո կընտրվի անցումային շրջանի Նախագահ. հանրային քննարկումները շարունակվում են
ՍՏԵՓԱՆԱԿԵՐՏ, 11 նոյեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ Ա. Ղուլյանը նշել է, որ նոր Սահմանադրության նախագծում փոխվելու է դատավորների նշանակման կարգը: «Դատավորներին նշանակելու է Ազգային ժողովը՝ ունենալով Բարձրագույն դատական խորհրդի առաջարկությունները»,- ասել է ԱԺ նախագահը:
«Նոր Սահմանադրությամբ նախատեսվում է, որ հանրապետության նախագահի և ԱԺ-ի ընտրությունները լինելու են նույն տարում, նույն օրը: Այսինքն` գալիք 2020 թվականի ընտրություններից սկսած մեր երկրում տեղի են ունենալու համապետական ընտրություններ: Նոր Սահմանադրությամբ Նախագահը իրավունք է ունենալու ցրելու Ազգային ժողովը, բայց այդ դեպքում հրաժարական պիտի տա նաև Նախագահը: Մենք ԱԺ-ին նույնպես Հանրապետության Նախագահին անվստահություն հայտնելու հնարավորություն ենք տվել, բայց այս դեպքում էլ ԱԺ-ն պիտի արձակվի»,- պարզաբանել է Ա. Ղուլյանը:
Բանախոսը նշել է նաև, որ նախատեսվում է կառավարման նոր համակարգը՝ գործադիր ու օրենսդիր հարաբերություններով, գործարկել 2017 թվականից: «Գալիք սեպտեմբերին մեր երկրում ավարտվում են գործող նախագահի լիազորությունները, և շատերին է հետաքրքրում, թե ինչ է լինելու մինչև 2020 թվականը: Քանի որ մենք նոր Սահմանադրությամբ նախատեսում ենք, որ Խորհրդարանը և նախագահը ընտրվելու են միասին, նույն օրը, ըստ Սահմանադրության նախագծի՝ առաջարկվում է, որ 2017 թվականին՝ նախագահի լիազորությունների ավարտից առաջ, ԱԺ-ն ընտրի անցումային շրջանի նախագահ՝ մրցակցային հիմունքներով: Խորհրդարանի բոլոր խմբակցությունները իրավունք են ունենալու թեկնածու առաջադրել անցումային շրջանի նախագահի պաշտոնի համար: Ընտրված է համարվելու այն թեկնածուն, որը ստանալու է պատգամավորների ձայների 2/3-ը, այսինքն` նվազագույնը 22 ձայն ստացող թեկնածուն լինելու է Արցախի Հանրապետության նախագահ՝ 2017 թվականի սեպտեմբերից մինչև 2020 թվականի ապրիլն ընկած ժամանակահատվածում»,- պարզաբանել է Ա. Ղուլյանը:
Հանդիպման ընթացքում Աշոտ Ղուլյանն ու մասնագիտական հանձնաժողովի անդամները լսել են ներկաների դիտարկումները և պատասխանել նրանց հուզող հարցերին:
