Հայաստանի Հանրապետության մանկավարժական համալսարանի հեռուստառադիոլրագրության ամբիոնի հեռուստառեժիսորայի և մոնտաժի դասախոս Արսեն Առաքելյանն Արցախի պետական համալսարանի լրագրության բաժնի ուսանողների համար ռեժիսորական դասընթացներ է անցկացնում:
ՀՊՄՀ-ի դասախոսն ԱրՊՀ-ում ռեժիսորական դասընթացներ է անցկացնում
ՍՏԵՓԱՆԱԿԵՐՏ, 15 նոյեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ` ԱրՊՀ-ի նախաձեռնությամբ երեկ մեկնարկած դասընթացները տևելու են երեք օր:
Արսեն Առաքելյանը նշել է, որ արցախցիների անկոտրում ոգին նրան հին Սպարտան է հիշեցնում:
«Շատ հաճելի է, որ անպարտելի մարդու տեսակը տեսնում եմ նաև լսարանում` ուսանողների մեջ: Նրանց հետ շփումը շատ բան է տալիս նաև ինձ:
Դասընթացների ընթացքում ուսանողներին փորձում եմ սովորեցնել լրագրության նրբությունները, լրագրողի և ռեժիսորի համատեղ աշխատելու հմտությունները: Լրագրողի աշխատանքը նրանով է հետաքրքիր, որ այն ամենը, ինչ շրջապատում է մեզ տեղեկատվություն է, որի ներկայացնելուց արդեն երևում է լրագրողի վարպետությունը: Լրագրողի խոսքը մեծ ազդեցություն է գործում, երբ այն իր մեջ ներառում է ռեժիսորայի տարրեր»,- ասել է Ա. Առաքելյանը:
Խոսելով ամերիկայի ֆիլմարտադրության մասին` Արսեն Առաքելյանն անդրադարձել է պատերազմական գործողություններում իրականությունը ճիշտ նկարագրելուն.
«ԱՄՆ-ը պարտվելով վիետնամական պատերազմում` հաղթել է տեղեկատվական դաշտում, որովհետև այդ պատերազմի մասին պատմող բոլոր ամերիկյան ֆիլմերն այնպիսի տպավորություն են ստեղծում, որ հաղթողները հենց ամերիկացիներն են: Այսինքն իրականությունը կարողանում են շուռ տալ արվեստով: Իսկ մեր իրականությունն այժմ այն է, որ մենք ենք հաղթողը և պետք է դա մի քանի անգամ ավելի լավ ու ճիշտ մատուցել աշխարհին:
Ժամանակի պահանջն այնպիսին է, որ դու այժմ չես կարող մի ռեպորտաժ պատրաստել, որը չլինի մինի ֆիլմ. հակառակ դեպքում այն ոչ մեկին չի հետաքրքրի: Ուսանողների աշխատանքների մեջ ես արդեն տեսնում եմ Արցախի ապագա լրագրողների յուրահատուկ մտահորիզոնը:
Վստահ եմ, նրանք մեծ հաջողությունների կհասնեն»:
ԱրՊՀ լրագրության բաժնի ուսանողուհի Վալենտինա Գրիգորյանը խոսելով դասընթացների կարևորության մասին` ընդգծել է, որ ուսանողները վաղուց էին սպասում այսպիսի դասախոսության.
«Մեզ համար շատ կարևոր է Արսեն Առաքելյանի այցը, որովհետև նման գիտելիքներով օժտված մարդը միշտ էլ կարող է այնպիսի տեղեկություններ տալ, որոնք հետագայում հնարավոր է օգտագործել պրակտիկայում»:
Դասընթացների կարիքն ունի յուրաքանչյուր ապագա լրագրող, նշել է մեկ այլ ուսանողուհի Աննա Ահարոնյանը.
«Արդեն երկրորդ օրն է, ինչ Արսեն Առաքելյանը մեզ մոտ դասընթացներ է իրականացնում: Նման մասնագետների փորձը կարող է մեզ համար գիտելիքների հիանալի շտեմարան դառնալ:
Վստահ եմ` նրա մասնագիտական խորհուրդների շնորհիվ մեծ հաջողությունների կհասնեմ: Հուսանք այս հանդիպումները շարունական կլինեն, և այն ինչ այս օրերի ընթացքում չենք հասցնի սովորել` կլրացնենք հաջորդ հանդիպումների ժամանակ»:
