Ադրբեջանի իշխանությունները որոշել են նոր մակարդակի հասնել եւ Լեռնային Ղարաբաղ արտասահմանցիների այցելությունների համար քրեական պատասխանատվություն ներդնել:
Ադրբեջանի «սեւ ցուցակին» ավելացել է Լեռնային Ղարաբաղ այցելելու համար քրեական պատասխանատվությունը
ՍՏԵՓԱՆԱԿԵՐՏ, դեկտեմբերի 16, ԱՐՑԱԽՊՐԵՍ: ԱՊԱ-ն հայտնում է, որ երկրի գլխավոր դատախազությունը ձգտում է հասնել Ալեքսանդր Լապշինի հանձնմանը: Ադրբեջանական լրատվամիջոցների տեղեկություններով՝ ներկայումս նա ձերբակալվել է Բելառուսի իշխանությունների կողից: Նրան հետախուզելու պատճառը 2011 եւ 2012 թվականներին Լեռնային Ղարաբաղ կատարած այցելությունն է եւ բլոգում գրառումները, փոխանցում է NEWS.am-ը:
Համացանցում Ալեքսանդր Լապշինի գրառումներից ակնհայտ է, որ պատմությունը մի քանի տարի առաջ է սկսվել:
Մեջբերում Ա. Լապշինի գրառումից. «Ինձ համար սեւ ցուցակ «այդ ցավալի ճանապարհը» սկսվեց զվարճալի երկխոսությունից, որը 2 ամիս առաջ է տեղի ունեցել: Անանուն բարոյախոսն ինձ գրում էր, որ եթե անհապաղ չհեռացնեմ հայերի կողմից օկուպացված Լեռնային Ղարաբաղի մասին գրառումները, ապա ինձ անմիջապես կընդգրկեն Ադրբեջանում նոն գրատա համարվող անձանց ցուցակում: Պատասխանեցի, որ ոչ մի բան չեմ ջնջի, եւ որ բոլոր իրենց ցուցակներն անհեթեություն եւ անեկդոտ են, քանի դեռ դատարանի որոշում եւ ապացույցներ չկան: Նա պատասխանեց, որ չի պատրաստվում որեւէ բան ապացուցել եւ մեկ րոպեում ինձ ցուցակի մեջ կմտցնի: Պատասխանեցի, որ պատրաստ եմ այդ խաղը խաղալ եւ Ադրբեջանի ԿԳԲ-ին թեստավորել: Նրա՝ դուք մեզ թերագնահատում եք գրառմանը պատասխանեցի՝ ամենեւին, ես ձեզ ԳԵՐԱգնահատում եմ, եթե հաշվի առնենք 1992-1994 թվականների ձեր «հաջողությունները», չնայած կենդանի ուժի եւ տեխնիկայի վիթխարի գերազանցությանը: Պատասխանեց, թե հայերին Ռուսաստանն է օգնել: Ես էլ գրեցի, որ բացարձակապես չեզոք եմ հայերի հետ նրանց հակամարտության հարցում եւ նայում եմ չոր փաստերի դիրքերից, երբ հայերի նկատմամբ առավելություն ունենալով՝ պարտվել եք: Նշանակում է ինքներդ ձեզ չեք հարգում, բայց ձեր նկատմամբ հարգանք եք պահանջում օտարազգիների՞ կողմից: Եվ այդ ո՞վ է ում թերագնահատում: Դրանով բանավեճն ավարտվեց, եւ ես հայտնվեցի նրանց ցուցակում»:
Դատելով ամեն ինչից՝ Ալեքսանդր Լապշինն իսկապես «գերագնահատել» է Ադրբեջանի հատուկ ծառայությունների մտավոր ընդունակությունները, որոնք որոշել են անցնել ապօրինի գործողությունների սպառնալիքների: Բելառուսի իշխանությունների որոշման մասին դեռեւս ոչինչ չի հաղորդվում:
