ԼՂՀ Կառավարության շենքի դիմաց այսօր տեղի է ունեցել «Դեմ եմ Ստեփանակերտի հասարակական տրանսպորտի թանկացմանը» նախաձեռնող խմբի բողոքի ակցիան:
ԼՂՀ վարչապետն ընդունել է «Դեմ եմ Ստեփանակերտի հասարակական տրանսպորտի թանկացմանը» նախաձեռնող խմբի անդամներին
ԼՂՀ Կառավարության շենքի դիմաց այսօր տեղի է ունեցել «Դեմ եմ Ստեփանակերտի հասարակական տրանսպորտի թանկացմանը» նախաձեռնող խմբի բողոքի ակցիան:
«Արցախպրես»-ի հաղորդմամբ՝ ակցիայի մոտ երկու տասնյակ մասնակիցներ եկել էին իրենց բողոքն արտահայտելու Ստեփանակերտի քաղաքապետարանի որոշմամբ հոկտեմբերի 1-ից մայրաքաղաքի երթուղային տրանսպորտի ուղեվարձը 30 դրամով թանկացնելու դեմ։
Ակցիայի մասնակիցների հետ նախ հանդիպել են ԼՂՀ վարչապետի մամլո խոսնակ Արտակ Բեգլարյանը և կառավարության տեղեկատվության ու հասարակայնության հետ կապերի բաժնի ներկայացուցիչ Վահրամ Պողոսյանը, ովքեր առաջարկել են ներկաներին հինգ հոգով բարձրանալ ԼՂՀ վարչապետի մոտ ու ներկայացնել իրենց հուզող հարցերը։Ակցիայի մասնակիցները համաձայնվեցին հանդիպմանը՝ լրագրողների մասնակցության պայմանով:
ԼՂՀ վարչապետ Արա Հարությունյանը, ողջունելով ներկաներին, սկզբում առաջարկեց ակտիվիստներին ներկայացնել իրենց պահանջները:
Նախաձեռնող խմբի անդամ Բագրատ Օհանջանյանը նշեց, որ քաղաքային տրանսպորտի ուղեվարձի թանկացումը, իրենց կարծիքով, հիմնավորված չէ, և կոչ արեց բեկանել քաղաքապետարանի որոշումը: Եթե նույնիսկ հիմնավորված է, Բ. Օհանջանյանի խոսքով, նախաձեռնող խմբի պահանջն է, որ կառավարությունը սուբսիդավորի թանկացումը, որը տարվա կտրվածքով մոտ 100 մլն դրամ է կազմում:
Վարչապետը նախ նշեց, որ քաղաքապետարանի որոշումը ի պաշտոնե լիազորված չէ բեկանել, քանի որ տեղական ինքնակառավարման մարմիներն անկախ են, և քաղաքապետը հաշվետու է միայն ավագանուն: Ինչ վերաբերում է ուղեվարձի թանկացման չհիմնավորված լինելուն՝ Ա. Հարությունյանն ասաց, որ քաղաքային երթուղիները սպասարկող ընկերությունները վաղուց արդեն վնասով են աշխատում, և այդ մասին հաստատել են նաև անկախ աուդիտորական կազմակերպությունների կողմից անցկացված ուսումնասիրությունները: «Հանրային տրանսպորտը միայն Ստեփանակերտի ներքաղաքային երթուղիները սպասարկող մեքենաները չեն, և եթե դուք կառավարությունից պահանջում եք սուբսիդավորել ուղեվարձի թանկացումը, ապա այդ դեպքում պետք է սուբսիդավորվեն ամբողջ ներհանրապետական երթուղիները, քանի որ արդար չէ պետական բյուջեից դոտացիա տրամադրել ազգաբնակչության մի հատվածին, իսկ մյուս հատվածին՝ ոչ»,- ասաց Ա. Հարությունյանը՝ որպես օրինակ նշելով բնակչության համար էլեկտրաէներգիայի սակագնի մասով կառավարության կողմից պարբերաբար իրականացված սուբսիդավորումները:
Ա. Հարությունյանը հավելեց նաև, որ կառավարությունը ևս քայլեր է ձեռնարկում բարձր գների դեմ՝ տարեցտարի բարձրացնելով աշխատավարձերը, թոշակներն ու նպաստները՝ այդ քաղաքականությամբ ինչ-որ տեղ ստիպելով նաև մասնավոր հատվածին, որ նրանք ևս աշխատավարձերի բարձացումներ կատարեն:
Նախաձեռնող խմբի անդամներից մեկի այն հարցին, թե հանրային տրանսպորտը սուբսիդավորվում է նաև եվրոպական առաջատար պետություններում, վարչապետը նշեց, որ սուբսիդավորման արտասահմանյան հայտնի փորձը հիմնականում թիրախային է, այսինքն՝ այն մասնակի կերպով վերաբերում է հասարակության առանձին խավերին, որը կարելի է կիրառել նաև Արցախի պարագայում, և մասնակիցներին խորհուրդ տվեց այս ուղղությամբ առաջարկներ ներկայացնել:
Այնուամենայնիվ նախաձեռնող խմբի անդամները նշեցին, որ չնայած վարչապետի պարզաբանումներին, իրենք բավարարված չեն, քանի որ, միևնույն է, քաղաքային տրանսպորտի ուղեվարձը թանկանալու է, և իրենք շարունակելու են իրենց բողոքի ակցիաները: