Վիրահայոց թեմի «Հայարտուն» կենտրոնի Գալուստ Գյուլբենկյան սրահում ոգեկոչվել է հայերեն տպագիր Աստվածաշնչի 350-ամյակը:
Վիրահայոց թեմում նշել են հայերեն տպագիր Աստվածաշնչի 350-ամյակը
ՍՏԵՓԱՆԱԿԵՐՏ, դեկտեմբերի 17, ԱՐՑԱԽՊՐԵՍ: Ինչպես տեղեկացնում է Վիրահայոց թեմի մամուլի դիվանը, միջոցառումը սկսվել է Թբիլիսիի Սուրբ Գևորգ առաջնորդանիստ եկեղեցու երգչախմբի կատարմամբ «Տերունական աղոթքով, ապա «Հրաշափառ»-ի հնչյունների ներքո հանդիսավորությամբ դահլիճ է բերվել Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի Սրբատառ Կոնդակը՝ Աստվածաշնչի հայերեն տպագրության 350-ամյակի առիթով: Կոնդակն ընթերցել է Վիրահայոց թեմի առաջնորդի օգնական հոգեշնորհ Տեր Խորեն վարդապետ Հովհաննիսյանը:
Ցուցադրվել է տեսաֆիլմ՝ նվիրված Ամստերդամում Ոսկան Երևանցու ազգանվեր գործունեությանը, որի արդյունքում 1666 թվականին 5 հազար օրինակ տպաքանակով առաջին անգամ հայերեն Աստվածաշունչ տպագրվեց:
Միջոցառումն ամփոփել է Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանը: Իր օրհնությունը հղելով ներկաներին՝ Թեմակալ առաջնորդը արժևորել է հայերեն Աստվածաշնչի տպագրության դերն ու նշանակությունը, գնահատելով այն որպես ազգայինի պահպանության, գրի ու մշակույթի զարգացման և քրիստոնեական հավատքի ամրապնդման եզակի միջոց:
