Կանադայում ՀՀ դեսպան Արմեն Եգանյանի հովանու ներքո և «Atken Armenian» հիմնադրամի նախաձեռնությամբ Մոնրեալ քաղաքում ի աջակցություն Հայաստանի մանուկների դեկտեմբերի 16-ին կայացել է դասական երաժշտության համերգ, որը հիմնադրամի առաջին խոշոր ձեռնարկն էր՝ ուղղված Հայաստանի գյուղական շրջաններում երաժշտական կրթության սատարմանը և տաղանդաշատ սաների հայտնաբերմանը:
Մոնրեալում ի աջակցություն Հայաստանի երեխաների դասական երաժշտության համերգ է կայացել
ՍՏԵՓԱՆԱԿԵՐՏ, դեկտեմբերի 20, ԱՐՑԱԽՊՐԵՍ: Այս մասին տեղեկացրին ՀՀ արտաքին գործերի նախարարության մամուլի, տեղեկատվության և հասարակայնության հետ կապի վարչությունից՝ հավելելով. «Համերգին ներկա էին մեծ թվով արվեստագետներ, հասարակական-քաղաքական գործիչներ, դիվանագետներ, լրագրողներ, կանադահայ համայնքի ներկայացուցիչներ:
Համերգից առաջ ունեցած իր ելույթում Կանադայում ՀՀ դեսպան Արմեն Եգանյանը շնորհակալություն հայտնեց «Atken Armenian» հիմնադրամին` միջոցառման կազմակերպման համար և ընդգծեց, որ նմանատիպ մշակութային ձեռնարկների շնորհիվ հիմնադրամը կարողանում է Հայաստանի մանուկներին երաժշտական կրթություն ստանալու նոր հնարավորություններ ընձեռել: Դեսպանը նշեց, որ համերգը կարելի է համարել 2016 թվականի ընթացքում Կանադայում կայացած բազմաթիվ մշակութային միջոցառումների եզրափակիչ գեղեցիկ ակորդներից մեկը:
Համերգի ընթացքում կատարումներով հանդես եկան հայազգի հայտնի օպերային երգչուհի Ալին Կութանը, «ՀԱՅԿ» վոկալ քառյակը, «McGill» կոնսերվատորիայի երեխաների և երիտասարդների երգչախումբը, երաժշտական այլ խմբեր և անհատ կատարողներ»: