Լեռնային Ղարաբաղի հակամարտությունը կարող է կարգավորվել միայն խաղաղ ճանապարհով: Բայց ապրիլին Ղարաբաղում տեղի ունեցած քառօրյա պատերազմի համար պատասխանատվությունը կրում է Ադրբեջանը:
Լեռնային Ղարաբաղը Ադրբեջանի կազմում ընդգրկվել չի կարող. Կոնստանտին Զատուլին
ՍՏԵՓԱՆԱԿԵՐՏ, դեկտեմբերի 22, ԱՐՑԱԽՊՐԵՍ: Tert.am-ի հետ զրույցում այս մասին ասաց ԱՊՀ երկրների ինստիտուտի տնօրեն Կոնստանտին Զատուլինը:
Հարցին՝ ինչո՞ւ Ադրբեջանը չի կատարում պայմանավորվածությունները, որոնք կողմերի միջև ձեռք բերվեցին Վիեննայում, Զատուլինը պատասխանեց. «Եթե սկսենք մեզ հարցնել, թե ինչո՞ւ որևէ բան չի կատարվում, պիտի վերադառնանք 80-ականներ ու վերանայենք այն, ինչ տեղի ունեցավ Լեռնային Ղարաբաղի շուրջ: Մենք գիտենք, որ այն, ինչ տեղի ունեցավ ապրիլին, այդ ողբերգական իրադարձությունները, տեղի ունեցան Ադրբեջանի կողմից հրադադարի ռեժիմը խախտելու հետևանքով: Մինչ այդ էլ հրադադարի ռեժիմը խախտվում էր, բայց ոչ նման տեմպերով, որի ականատեսը մենք եղանք քառօրյա պատերազմի ժամանակ»:
Կոնստանտին Զատուլինի խոսքով՝ կարևոր է նվազեցնել տրամադրությունները, որոնք հայաստանյան հանրությունն ունի ապրիլյան իրադարձություններից հետո:
«Ցավալի է, բայց Հայաստանում հիմա կասկածներ կան դաշնակցային պարտավորությունների կատարման վերաբերյալ և, կարծում եմ, Ռուսաստանը պետք է ամեն ինչ անի՝ այս կասկածները նվազեցնելու, չեզոքացնելու ուղղությամբ»,- նշեց քաղաքագետը:
Այնինչ, Զատուլինի համոզմամբ, ՀՀ-ՌԴ դաշնակցային հարաբերությունները խորն են ու ընդգրկուն: «Միայն այս տարի Հայաստանի և ՌԴ միջև ստորագրվեց ընդանուր հակաօդային պաշտպանության համակարգ ստեղծելու մասին պայմանագիրը, ՌԴ-ն առաջին անգամ «Իսկանդեր» տրամադրեց այլ պետության, որը Հայաստանն էր»,- մանրամասնեց քաղաքագետը:
ԼՂ հակամարտությունը, Կոնստանտին Զատուլինի կարծիքով, կարող է լուծվել հետևյալ բանաձևով՝ ԼՂՀ-ն Ադրբեջանի մաս դառնալ չի կարող, Ադրբեջանի կազմում չպիտի ընդգրկվի, որովհետև նախկին խորհրդային ադրբեջանական տարածք այլևս գոյություն չունի, իսկ ԼՂ հարակից շրջանները պետք է վերադարձվեն Ադրբեջանին:
Մեր ճշտող հարցին, թե սա «լավրովյան պլանի» համատեքստում չէ՞, Զատուլինը պատասխանեց, որ սա իր անձնական, ոչ թե պաշտոնական դիրքորոշումն է, հետևաբար «զատուլինյան պլանը», որն ի դեպ, նրա համոզմամբ, Ադրբեջանում դիտարկվում է որպես հայկական դիրքորոշում հարցի կարգավորման վերաբերյալ: