Լեհաստանի Սոսնովեց քաղաքում բացվելու է լեհական մետաքսյա գոտիների ցուցահանդես:
Historykon. Լեհ պալատականների համար մետաքսյա գոտիները կարում էին հայ վարպետները
ՍՏԵՓԱՆԱԿԵՐՏ, հունվարի 14, ԱՐՑԱԽՊՐԵՍ: Պարբերականը կարճ պատմություն է ներկայացնում, թե երբ եւ ինչպես են լեհ պալատականները սկսել գոտիներ կրել, եւ ով էր դրանք ստեղծում, գրում է Historykon-ը:
Կարված գոտին պալատականների հանդերձանքի կարեւոր դետալ դարձավ արդեն 16-րդ դարի 1-ին կեսին: Քանի որ նորաձեւությունը եկել էր Արեւելքից, ապա այդ գոտիների կարի արհեստանոցները պարսկական անուններով էին կոչում, իսկ դրանք կարում էին հայերը, որոնց հովանավորում էին լեհ մեծահարուստները:
16-17-րդ դարերում տարածված էին թուրքական գոտիները, որոնք Լեհաստան էին ներկրում Լվովի հայ վաճառականները: Իսկ 17-րդ դարի երկրորդ կեսից Լեհաստանում նաեւ թանկարժեք պարսկական գոտիներ հայտնվեցին, որոնք 4-5 մ երկարություն եւ մոտ 60 սմ լայնություն ունեին:
Առաջին արհեստանոցները հայտնվեցին Ստանիսլավով քաղաքում՝ ներկայումս Ուկրաինայի Իվանո-Ֆրանկովսկ քաղաքում: Իսկ ամենահայտի արհեստանոցը Սլուցկեում էր՝ ներկայիս Բելառուսի տարածքում: Արհեստանոցի ղեկավար իշխան Միխայիլ Կազմիր Ռադզվիլը դրա ղեկը հանձնել էր հայ վարպետ Յան Մաջարսկուն՝ Հովհաննես Մաջարյանցին, իսկ նրանից հետո՝ նրա որդուն: