ՍՏԵՓԱՆԱԿԵՐՏ, հունվարի 15, ԱՐՑԱԽՊՐԵՍ: Խոսելով «Մանչեսթեր սիթի» դեմ խաղի մասին՝ հայ կիսապաշտպանն ասել է. «Ես «Մանչեսթեր Սիթի»-ի դեմ խաղում վատ խաղացի: Ինձ պետք էր հասկանալ, թե որտեղ էի սխալվում, ինչ է պետք անել դրանից հետո: Ես Մոուրինյոյի հետ շատ էի խոսում, և նա ինձ վստահություն ներշնչեց»:

Հիշելով «Յունայթեդ»-ում առաջին օրերին ստացած վնասվածքի մասին` Մխիթարյանը առանձնացրել է, որ ինքը ոգևորված էր այն մտքից, որ խաղալու է ՄՅու-ի կազմում, դրա համար էլ չի ասել Մոուրինյոյին ոտքի ցավի մասին. «Հաջորդ անգամ ավելի զգույշ կլինեմ, հարկավոր չէ ռիսկի դիմել: Երբ առաջին անգամ «Օլդ Տրաֆորդ»-ում դուրս եկա փոխարինման, մի պահ փշաքաղվեցի»,-ասել է Մխիթարյանը:

Անդրադառնալով իր նախկին մարզիչ Յուրգեն Կլոպին և ներկայիս մարզիչ Ժոզե Մոուրինյոնին, որպես համեմատություն Մխիթարյանը փաստում է. «Մոուրինյոն ընկերական է, բայց գուցե նաև խիստ: Նա կարող է լավագույնն ստանալ քեզնից: Գուցե նա չի գրկում իր ֆուտբոլիստներին, ինչպես Կլոպը, բայց դու զգում ես նրա վստահությունը, որը շատ կարևոր է ֆուտբոլիստի համար»:

««Մանչեսթեր Յունայթեդ»-ի կազմում կան տեխնիկապես շատ հարուստ ֆուտբոիստներ, բայց դու պետք է խաղաս ի սրտե: Խաղում ես ոչ թե քո, այլ ակումբի վեհությունը ցույց տալու համար: Նվիրված պետք է լինես, այլապես երկրպագուները կզգան դա»,- կարևորել է Հայաստանի լավագույն ֆուտբոլիստը:

Խոսելով «Լիվերպուլ»-ի հետ խաղի մասին՝ հայ ֆուտբոլիստը փաստել է, որ այն խաղ է 6 միավորի համար և ինքը կարող է օգնել թիմին:

Անգլիական պարբերականն անդրադարձել է նաև Հայաստանին` մեջբերելով մի քանի փաստեր: «Նոյյան տապանի և աշխարհի առաջնության աստղերի երկիր Հայաստան: Մխիթարյանի հայրենիքը սահմանակից է Թուրքիային, Վրաստանին, Ադրբեջանին և Իրանին: Անկախություն է ձեռք բերել 1991 թվականին: Ժամանակին այն իր տարածքի մեջ էր ընդգրկում Արարատ լեռը` Նոյյան տապանը հանգրվանած սարը»,- գրում է DailyMail-ը, որն «աշխարհի առաջնության աստղերի երկիր Հայաստան» գրելով՝ նկատի է ունեցել ֆուտբոլի Ֆրանսիայի հավաքականի նախկին անդամներ Յուրի Ջորկաեֆին և Ալեմ Բոգոսյանին։