ԵԱՀԿ-ում Գերմանիայի նախագահության հայտարարությունը հերքում է պաշտոնական Բաքվի պնդումները:
ԵԱՀԿ գերմանական նախագահության հայտարարությունը հերքում է պաշտոնական Բաքվի պնդումները
ՍՏԵՓԱՆԱԿԵՐՏ, հունվարի 17, ԱՐՑԱԽՊՐԵՍ: ԵԱՀԿ-ում Գերմանիայի նախագահության հայտարարությունում, որը դեկտեմբերի 31-ին կայացած ԵԱՀԿ մշտական խորհրդի հատուկ նիստում հնչեցրել է Գերմանիայի դեսպան Էբերհարդ Պոլը, հստակ նշվում է, որ ԵԱՀԿ Երեւանյան գրասենյակի մանդատը երկարաձգումը արգելափակելու համար Ադրբեջանի կողմից բերվող «պատճառներն» անհիմն են, գրում է NEWS.am-ը:
Ստորեւ ներկայացնում ենք ԵԱՀԿ-ում գերմանական նախագահության հայտարարությունը.
«Ինչպես գիտեք, որ Նախապատրաստական կոմիտեում հնարավոր չեղավ հասնել կոնսենսուսի Երեւանում ԵԱՀԿ գրասենյակի, Ուզբեկստանում Ծրագրերի համակարգողի, Տաջիկստանում գրասենյակի, Բիշքեկում Կենտրոնի, երկու ռուսական սահմանային անցակետերում դիտորդական առաքելության մանդատների երկարաձգման, ինչպես նաեւ 2016թ.Հավաքական բյուջեի վերանայման վերաբերյալ: Բոլոր այս որոշումներում մենք մոտ ենք կոնսենսուսին:
Բոլոր այս որոշումներում կոնսենսուս հասնելու խոչընդոտն է Երեւանում ԵԱՀԿ գրասենյակի օրակարգում նախատեսված մի ծրագիր: Մեր քննարկումների ժամանակ մի պատվիրակություն մտահոգություն էր հայտնել, որ մարդասիրական ականազերծման ոլորտում նախատեսված այդ ծրագիրը հակասում է գրասենյակի մանդատին: Թույլ տվեք տեղեկացնել ձեզ, որ 2016թ.-ի հավաքական բյուջեի բանակցություններից հետո Գերմանական նախագահությունը Երեւան գործուղեց իր հատուկ ներկայացուցիչ Բեխլերին` այդ ծրագրի գործունեությունն ուսումնասիրելու առաջադրանքով: Վերջինիս ուսումնասիրության հիման վրա, մենք եկանք այն եզրակացության, որ տվյալ ծրագիրը գրասենյակի մանդատից դուրս չէ: Այնուհանդերձ, մենք ի գիտություն ընդունեցինք, որ մտահոգությունները պահպանվում են եւ մենք հավատում ենք, որ հնարավոր է փարատել այդ մտահոգությունները:
Ավստրիական նախագահության հետ մեկտեղ, մենք աշխատել ենք այս ուղղությամբ: Խիստ ցավալի է, որ մինչ այժմ հնարավոր չի եղել համաձայնության գալ Երեւանի գրասենյակի մանդատի երկարաձգման շուրջ, թեեւ բովանդակային առումով բոլորի համար ընդունելի որոշումը գտնվել էր:
Մնացած հարցերը բացարձակապես ընթացակարգային բնույթի են, եւ մենք վստահ ենք, որ դրանք շուտով կգտնեն իրենց լուծումն ավստրիական նախագահության ղեկավարության ներքո: Մենք հասկանում ենք, որ դա թույլ կտա ընդունել ներկայումս արգելափակված որոշումները: Ելնելով այն հանգամանքից, որ մենք ակնկալում ենք այդ որոշումների մանդատների մոտալուտ ընդունումը, մենք խորհուրդ կտայինք Գլխավոր քարտուղարին այս պահին չնախաձեռնել այդ առաքելությունների փակման գործընթացները:
Թույլ տվեք ընդգծել, որ դաշտային առաքելություններն այս կազմակերպության առանձնահատուկ արժեքն են եւ մեր ընդհանուր պարտքն է ապահովել նրանց պատշաճ գործունեությունը: Ես կցանկանայի շեշտել, որ դաշտային առաքելությունների ծրագրերը եւ գործունեությունը պետք է բարձրացվեն, քննարկվեն եւ հասցեագրվեն բյուջետային բանակցությունների շրջանակներում: Այս տեսակետից, ես ձեր ուշադրությունն եմ հրավիրում այս իրավիճակի բացառիկության վրա, որը չպետք է ծառայի որպես օրինակ մանդատների ապագա երկարաձգման ժամանակ:
Առավել ընդհանուր դիտարկում. մտահոգիչ է, որ այն մասնակից երկրները, որոնք շարունակվող հակամարտությունների պայմաններում կարող են ամենաշատն օգտվել ԵԱՀԿ-ից եւ նրա գործիքակազմից, առավել քիչ են հակված փոխզիջման: Անփոփոխ դիրքորոշումների վրա պնդելը, ճկունության բացակայությունը, նույնիսկ այն դեպքում, երբ մտահոգությունները բովանդակային առումով հասցեագրված են, վնասակար են թե' մեր աշխատանքի, թե' անվտանգությունն ու համագործակցությունը առաջ մղելու մեր ընդհանուր գործունության համար: Եթե նման մոտեցումը շարունակվի կամ դառնա ընդհանուր գործառույթ, ապա այն կարող է կաթվածահար անել ԵԱՀԿ-ն:
Մենք չէինք ակնկալում այսքան կիսատ գործեր թողնել գալիք ավստրիական նախագահությանը: Այնուհանդերձ, թույլ տվեք կրկնել, որ համոզված եմ, որ այսօրվա խոչընդոտը գալիք օրերի ընթացքում իր արագ լուծումը կստանա: Սիրելի Կլեմենս, ցանկանում եմ քեզ կամք եւ հաջողություն»:
