«Ռուսթավի 2» հեռուստաալիքն իր կայքում հրապարակել է Վրաստանի պատրիարքարանի ներկայացուցիչ հայր Գեորգի Մամալաձեի նամակը, որը, ըստ հեռուստաալիքի, գրվել է երկու ամիս առաջ։
Լրատվամիջոցները հրապարակել են վրաց պատրիարքի դեմ մահափորձ ծրագրած քահանայի նամակը
ՍՏԵՓԱՆԱԿԵՐՏ, փետրվարի 14, ԱՐՑԱԽՊՐԵՍ: Պատրիարք Իլյա 2-րդին հասցեագրված նամակում խոսվում է իշխանության ներկայացուցիչների եւ պատրիարքարանի անդամների միջեւ կոպիտ խախտումների ու կոռուպցիոն համաձայնությունների մասին։
Ըստ հեռուստաընկերության՝ նամակը փոխանցել է նույն գաղտնի աղբյուրը, որը հայտնել է նաեւ պատրիարքի դեմ սպանության փորձի մեղադրանքով ձերբակալված Մամալաձեի ձերբակալության մասին, ինչը հաստատվել է Վրաստանի դատախազության կողմից։ Նամակը դեռեւս պաշտոնապես չի հաստատվել։
«Պատրիարքարանի գույքի կառավարման ծառայությունը ստեղծվել է 2015-ի սեպտեմբերի 14-ին, իսկ ես նշանակվել եմ այդ ծառայության ղեկավար։ 2015-ի դեկտեմբերին Սինոդի նիստի ժամանակ ես ցանկանում էի ներկայացնել ծառայության աշխատանքի եռամսյա հաշվետվությունը, սակայն կոնկրետ խմբերի կողմից այդ հաշվարկի հրապարակումն արգելափակվեց։ Այդ ամենից հետո այդ խմբերի ջանքերով ինձ ազատեցին տվյալ պաշտոնից, սակայն ես շարունակեցի աշխատել գույքի կառավարման տնօրենի տեղակալ, եւ ինձ նորից հասանելի էին նյութերը»,- ասվում է նամակում։
Քահանան հայտնել է, որ ծառայությունը քաղաքական ռեեստրից տեղեկության հարցում է արել եւ պարզել, որ կազմակերպությունների ցուցակում, որոնք, նրա հավաստմամբ, ամբողջությամբ ֆինանսավորվում են պատրիարքարանի կողմից, կան սահմանափակ պատասխանատվությամբ ընկերություններ, որոնք տարիներ շարունակ տարբեր գործունեություն են վարում, մասնավորապես՝ նավթամթերքի արդյունահանում, իրացում եւ վերամշակում, ինչպես նաեւ տեխնիկական սպիրտի ապօրինի արտադրություն։ Ցուցակում նաեւ նշված են շինարարական ու իրավաբանական ընկերություններ, որոնք, իբր, օրենքի կոպիտ խախտմամբ արդյունաբերական գործունեություն են վարում։ Ըստ նամակի՝ «հարցը բարդացնում է այն, որ անհնարին է պարզել, թե որտեղ են գրանցված այդ ընկերությունները, քանի որ, ըստ օրենքի, պատրիարքի վստահված անձն իրավունք ունի գրանցել ցանկացած ընկերություն»։
«Մինչ օրս այդ անհասկանալի ընկերությունները մեծ մասամբ ֆինանսական պարտքեր ունեն պետությանը եւ դրանց հաշվապահական հաշվետվությունը պետք է ուսումնասիրվի։ Վերջին հաշվով՝ դա սպառնում է եկեղեցու գույքին։ Պետք է նշել, որ այսօր հազարավոր հեկտար հողեր են օտարվել անհասկանալի համաձայնությունների հիման վրա, որոնցից պատրիարքարանը ոչ մի օգուտ չի ստանում»,- նշվում է փաստաթղթում։
Իսկ պատրիարքարանի հիվանդանոցը 5 միլիոն լարի (1.9 մլն դոլար) պարտք է կուտակել, որը, իբր, կուտակվել է աշխատակազմի մեքենայությունների արդյունքում։
«Ձերդ Սրբազանություն, դժբախտաբար պետք է հայտնեմ, որ հետաքննության արդյունքում տվյալ հարցի շուրջ հայտնաբերվել են որոշ բարձրաստիճան պաշտոնյաների եւ պատրիարքարանի ներկայացուցիչների անբարյացակամ շահեր»,- գրել է քահանան՝ խնդրելով Իլյա 2-րդին պատրիարքարանում ֆինանսական աուդիտ անցկացնել եւ լուծարել գույքի հարցերով պատրիարքի բոլոր լիազորագրերը։
