Հայ-ռուսական հիմնադրամի ստեղծման գաղափարն առաջացել է այն տրամաբանությամբ, որ հնարավորինս նպաստի Հայաստանի և Ռուսաստանի միջև համատեղ ծրագրերի իրականացմանը, Հայաստանից ապրանքների արտահանմանը դեպի ՌԴ, ինչպես նաև համատեղ ծրագրերի իրականացման միջոցով դեպի երրորդ երկրներ ապրանքների արտահանման ավելացմանը:
Հայ-ռուսական ներդրումային հիմնադրամի ստեղծման համար մշակվել և ռուսական կողմին են ներկայացվել ձևավորման մեխանիզմները
ՍՏԵՓԱՆԱԿԵՐՏ, փետրվարի 16, ԱՐՑԱԽՊՐԵՍ: Այս մասին «Արմենպրես»-ի հետ զրույցում ասաց ՀՀ տնտեսական զարգացման և ներդրումների նախարարի տեղակալ Հովհաննես Ազիզյանը: Նրա խոսքով` ՀՀ վարչապետի ՌԴ պաշտոնական այցի շրջանակներում առաջարկություն է եղել հայկական կողմից, և այդ մասին տարբեր մակարդակներով քննարկումներ են եղել, ինչից հետո ընդհանուր համաձայնություն է ձևավորվել:
«Հայ-ռուսական ներդրումային հիմնադրամի հիմնական ուղղվածությունն ինտեգրացիոն ծրագրերի իրականացումն է: Այսինքն` ծրագրեր, որոնք հնարավորություն կտան երկու երկրների միջև ձևավորել արդյունաբերության ճյուղերի կոոպերացիա և ֆինանսավորել բիզնես ծրագրեր: Հնարավորություն կընձեռվի մի կողմից՝ ՌԴ-ում արտադրվող ապրանքների օգտագործմամբ Հայաստանում վերամշակման որոշակի փուլում ստեղծել ապրանք և այն արտահանել, մյուս կողմից՝ ստեղծել և ֆինանսավորել համատեղ ձեռնարկություններ, որոնք կարտադրեն ապրանքներ երրորդ երկրների շուկա արտահանելու համար: Հիմնական նպատակն է երկու տնտեսությունների համատեղ զարգացմանը նպաստելը, ֆինանսավորման միջոցով այնպիսի արտադրություն ձևավորելը, որոնք հնարավորություններ կտան ստեղծել լրացուցիչ արտադրանք և բարձրացնել դրա որակն ու արտադրության ծավալները»,- ասաց փոխնախարարը:
Ազիզյանի ներկայացմամբ` հայկական կողմը մշակել է մոտեցումները, թե ինչ սկզբունքով և ինչ մեխանիզմներով պետք է այդ ֆոնդը ձևավորվի ու աշխատի: Այդ առաջարկություններն արդեն ներկայացվել են ռուսական կողմին: Նրա խոսքով` դրանք այժմ գտնվում են քննարկումների փուլում ռուսական կողմի արդյունաբերական, ֆինանսների, ինչպես նաև տնտեսական զարգացման նախարարությունների հետ:
«Ձևավորման տարբեր մեխանիզմների վերաբերյալ տարբեր մոտեցումներ ենք ներկայացրել: Հիմա քննարկումների փուլում ենք, ենթադրում ենք, որ մոտ մեկ ամսվա ընթացքում կվերջնամշակենք սխեման և արդեն կսկսենք աշխատել հիմնական ուղղություններով: Առաջիկայում ստեղծելու ենք պետական ներդրումային ֆոնդ: Առաջին մեխանիզմը հենց այդ ֆոնդի շրջանակում համագործակցությունն է և ռուսական կողմից մասնակցության ապահովումը»,-ասաց Հովհաննես Ազիզյանը: Հայ-ռուսական ներդրումային հիմնադրամի ստեղծման աշխատանքներն իրականացման առումով շատ արագ կընթանան, քանի որ տեսնում են շահագրգռվածությունը նաև ռուսական կողմից:
Վերջում փոխնախարարը հույս հայտնեց, որ մի քանի ամսում կձևավորվի հիմնադրամը, իսկ մինչև տարվա վերջ կֆինանսավորվեն առաջին ծրագրերը: