Լեռնային Ղարաբաղի Հանրապետությունում այսօր՝ փետրվարի 20-ին, ընթանում է Սահմանադրական փոփոխությունների հանրաքվեն։
Լեռնային Ղարաբաղի Հանրապետությունում ընթանում է սահմանադրական փոփոխությունների հանրաքվեն
ՍՏԵՓԱՆԱԿԵՐՏ, փետրվարի 20, ԱՐՑԱԽՊՐԵՍ: Ընտրական տեղամասերը բաց կլինեն առավոտյան 08:00-ից մինչեւ երեկոյան 20:00-ն, բացվել են 11 ընտրատարածքների 280 ընտրատեղամասեր, որից մեկը Երևանում՝ ՀՀ-ում գտնվող ԼՂՀ ներկայացուցչությունում, 1-ը՝ «Շուշի» քրեակատարողական հիմնարկում՝ կալանավորների համար: Հանրաքվեին մասնակցելու իրավունք ունի 102 հազար 757 քաղաքացի:
Սահմանադրության հանրաքվեն տեղամասերում անցկացնելու են 2 հազար 222 հանձնաժողովականներ, որից 68 տոկոսը անկուսակցական են: Քվեարկության ընթացքին հետևելու է 30-ից ավելի երկրի 104 միջազգային դիտորդ, 103 տեղական դիտորդ, ինչպես նաև 80-ից ավելի ԶԼՄ ներկայացուցիչ: Ընտրատեղամասերը կփակվեն ժամը 20:00-ին:
ԼՂՀ-ում կայանալիք հանրաքվեին հետեւելու համար Արցախ են ժամանել փորձագետներ եւ լրատվամիջոցների ներկայացուցիչներ։ Ընտրատեղամաս է բացվել նաեւ Երեւանում՝ Հայաստանում բնակվող ԼՂՀ քաղաքացիների համար։
Սահմանադրական փոփոխությունները ենթադրում են անցում կառավարման նախագահական համակարգին։ Գործող սահմանադրությամբ, որն ընդունվել է 2006 թվականին, ԼՂՀ-ում կառավարման կիսանախագահական համակարգ է։
Վերոնշյալ բարեփոխումների նպատակն է մարդու ազատությունների եւ հիմնարար իրավունքների, ժողովրդավարության եւ օրենքի գերակայության, իշխանության ճյուղերի միջեւ հավասարակշռության ամրապնդումն ու բարելավումը, ինչպես նաեւ պետական կառավարման արդյունավետության բարձրացումը։
Հիշեցնենք, որ ԼՂՀ Ազգային ժողովը հունվարի 17-ին հավանություն է տվել սահմանադրական փոփոխությունների փաթեթին։ Փաթեթին կողմ է քվեարկել 20, դեմ 7 պատգամավոր, եւս մեկ պատգմավոր ձեռնպահ է մնացել։