Արցախում անցկացվող Սահմանադրության նախագծի հանրաքվեի քվեարկությանը մասնակցելու համար այսօր ժամը 12:30-ին, տիկնոջ հետ Ստեփանակերտի թիվ 3/3 ընտրատեղամաս է այցելել ԼՂՀ վարչապետ Արայիկ Հարությունյանը։
Մենք Սահմանադրական փոփոխություններ ենք անում մեր երկրի ու ժողովրդի համար. Արայիկ Հարությունյան
ՍՏԵՓԱՆԱԿԵՐՏ, փետրվարի 20, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ քվեարկելուց հետո լրագրողների հետ զրույցում, Արայիկ Հարությունյանը ասել է, որ վայրկյաններ առաջ՝ անձնագիրը ներկայացնելիս, հիշել է 1988 թ.-ի փետրվարի 20-ը:
«Իհարկե, այն ժամանակ երազում էինք ունենալ այսպիսի անձնագիր և այս անձնագրով այժմ վկայում ենք, որ արդեն ունենք ձևավորված պետություն, ձևավորված երկիր և ամենակարևորը, որ այդ երկիրը գնում է սահմանադրական բարեփոխումների՝ նպատակ ունենալով ժողովրդավարական արժեքներն ավելի խորը ամրապնդելու մեր երկրում»,- ասել է Ա. Հարությունյանը:
Անդրադառնալով այն հարցին, որ միջազգային հանրությունը՝ ԵԱՀԿ Մինսկի խմբի համանախագահները հայտարարել են, թե չեն ճանաչի ԼՂՀ-ի հանրաքվեի արդյունքները, և հանրաքվեն չի կարող Ղարաբաղի միջազգային ճանաչմանը հանգեցնել, ԼՂՀ վարչապետը նշել է, որ Արցախը սահմանադրական փոփոխություններ է կատարում իր երկրի ու ժողովրդի համար, որպեսզի կարողանան կառուցել այնպիսի երկիր, որտեղ ապրելը լինի և՛ հաճելի, և՛ պատվաբեր: