Մենք, որպես դիտորդներ, հնարավորություն ենք ունեցել լինելու Արցախի տարբեր ընտրատարածքներում, և ամեն տեղ շատ հանգիստ էր ընթանում հանրաքվեի գործընթացը:
Այս երկրում կա ժողովրդավարություն.Բոլիվիայի խորհրդարանական
ՍՏԵՓԱՆԱԿԵՐՏ, փետրվարի 21, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այս մասին քիչ առաջ մամլո ասուլիսի ժամանակ ասել է Բոլիվիայի բազմազգ պետության Պատգամավորների պալատի խորհրդարանական Ալիսիա Կանկիինը, ով Արցախ է ժամանել Սահմանադրության հանրաքվեին դիտորդական առաքելություն իրականացնելու նպատակով:
«Շատ ենք կարևորում Արցախում այն հանգամանքը, որ ժողովուրդը կարողանում է իր կամքն ազատ արտահայտել: Սահմանադրության հանրաքվեն մի գործընթաց է, որի ժամանակ ժողովուրդն է որոշում, թե ինչպիսի պետություն է ուզում: Արցախը նոր Սահմանադրությունից հետո ավելի կզարգանա»,- ասել է Ալիսիա Կանկիինը և շնորհակալություն հայտնել Արցախի ժողովրդին ջերմ ընդունելության և բարյացակամ վերաբերմունքի համար: Բոլիվիայի Պատգամավորների պալատի խորհրդարանական Նելլի Լենսինն էլ նշել է, որ իր համար մեծ պատիվ է լինել Արցախում: «Ամենակարևորը մեզ համար այն էր, որ ժողովուրդն ակտիվ մասնակցություն է ցուցաբերել: Հանրաքվեն անց է կացվել բարձր մակարդակով, և մենք էլ այստեղ ենք, որպեսզի վստահություն, եղբայրություն, ներդաշնակություն ստեղծենք 2 պետությունների միջև»,- ասել է Նելլի Լենսինը:
Բոլիվիայի Պատգամավորների պալատի խորհրդարանական Մարիո Միտայինը ևս իր գոհունակությունն է հայտնել Սահմանադրության հանրաքվեի գործընթացի վերաբերյալ:
«Այն բավականին բարձր մակարդակով էր կազմակերպված: Մենք նկատել ենք ժողովրդի զանգվածային մասնակցություն և կարող ենք ասել, որ Արցախում հաջողված է հանրաքվեն: Գոհ ենք և՛ տեղի ժողովրդից, և՛ իշխանություններից, ովքեր ազատ գործելու իրավունք և կամք ունեն»,- ասել է Մ. Միտայինը:
Բոլիվիայի Պատգամավորների պալատի խորհրդարանական և աշխատակազմի ներկայացուցիչ Սանդրա Կիրոսինը նշել է. «Վերադառնում ենք Արցախից այն վստահությամբ, որ Արցախի ժողովուրդն է իր «Այո»-ն ասել նոր Սահմանադրությանը: Մեզ համար շատ մեծ փորձ էր լինել Արցախում և մասնակցել նման համաժողովրդական հանրաքվեի: Այս երկրում կա ժողովրդավարություն, որն էլ ցույց է տվել այս հանրաքվեն: Ժողովրդի միասնությունը շատ կարևոր է: Աշխարհը կարող է առաջընթաց ապրել, երբ որ բոլորս միասին ենք: Կարծում եմ, Արցախում նոր զարգացումներ կլինեն այս հանրաքվեից հետո»: