Այսօր Արցախի պետական համալսարանում տեղի է ունեցել միջոցառում նվիրված՝ Հայրենյաց պաշտպանի տոն օրվան:
ԱրՊՀ-ում հայրենյաց պաշտպանի տոն օրվան նվիրված միջոցառում է կազմակերպվել
ՍՏԵՓԱՆԱԿԵՐՏ, փետրվարի 23, ԱՐՑԱԽՊՐԵՍ: Միջոցառմանը բացման խոսքով հանդես է եկել ԱրՊՀ ռեկտոր Մանուշ Մինասյանը, ով, շնորհավորել է հայրենյաց բոլոր պաշտպաններին, կարևորել՝ նրանց անձնուրաց ու հայրենանվեր առաքելությունն Արցախի պաշտպանության սուրբ գործին:
Մ. Մինասյանը շնորհակալագրեր է հանձնել ՊԲ «Ասպետ» համույթին և մի խումբ կամավորական ուսանողների, ովքեր ապրիլյան պատերազմի օրերին ակտիվ մասնակցություն են ունեցել մարտական գործողություններին:
Միջոցառմանն ցուցադրվել է ԱրՊՀ ուսանողների հետ տարվող աշխատանքների, հասարակայնության հետ կապերի և լրատվության բաժնի կողմից նկարահանված «Խիզախում» ֆիլմը, ուր պատմվում է ԱրՊՀ այն ուսանողների մասին, ովքեր ականատեսն ու մասնակիցն են եղել ապրիլյան մարտական գործողություններին:
Հայրենյաց պաշտպանի օրվան նվիրված միջոցառմանը հայրենասիրական երգերով հանդես է եկել ՊԲ «Ասպետ» համույթը, որից հետո համալսարանի ֆակուլտետների միջև անց է կացվել հայրենասիրական երգերի խաղ-մրցույթ:
«Արցախպրես»-ի թղթակցի հետ զրույցում շարքային Հայկ Խաչիյանը նշել է, որ Հայրենյաց պաշտպանի տոնը մեծ խորհուրդ և կարևորություն ունի իր համար:
«Նման միջոցառումները ոգևորում են զինվորներիս. մի պահ մենք կարծես կտրվում ենք զինվորական առօրյայից՝ ստանալով մեծ ուժ ու լիցք: Հպարտանում ենք՝ տեսնելով մեր թիկունքում կանգնած ազգին նվիրյալ երիտասարդներ ու առյուծ տղաներ ծնող, սնող ու դաստիարակող հայ մայրերին: Տոնի առթիվ շնորհավորում եմ բոլորիս՝ շարքային զինվորից մինչև գեներալ՝ ցանկանալով մեզ առողջություն, երջանկություն, հաջողություններ, անփորձանք ծառայություն, համայն հայությանն ու ողջ աշխարհին խաղաղություն: Հավաստիացնում եմ ձեզ, որ սահմանին կանգնած յուրաքանչյուր զինվոր միշտ պատրաստ է ցանկացած գնով թշնամու ոտնձգություններից պաշտպանել իր հայրենիքը»,-ասել է Հ. Խաչիյանը:
ԱրՊՀ ուսանողների հետ տարվող աշխատանքների, հասարակայնության հետ կապերի և լրատվության բաժնի պետ Զարինե Սառաջյանն էլ նշել է, որ Հայրենյաց պաշտպանի օրը բոլորի տոնն է:
«Յուրաքանչյուր ոք, ով ապրում է Արցախում, ինքնին հայրենյաց պաշտպան է: Միշտ հիշենք. hայրենիքից լավ տեղ չկա աշխարհում:
Եկեք միասին հաղթահարենք բոլոր դժվարություններն ու միասին էլ կերտենք մեր հայրենիքի ապագան»,-նշել է Զ. Սառաջյանը:
Միջոցառմանը ներկա էին համալսարանի պրոֆեսորադասախոսական կազմը, ուսանողներ և ՊԲ զինծառայողներ, հյուրեր և այլք:
Լուսանկարները` Արթուր Շահնազարովի
