Հասարակայնության հետ կապերի հայաստանյան ասոցիացիան (APRA), Դավոսի հաղորդակցության համաշխարհային ֆորում ասոցիացիայի (World Communication Forum Association) հետ համագործակցությամբ մարտի 21-22 Երևանում կազմակերպել է WCFDavos/Yerevan երկօրյա ֆորում:
Երևանում մեկնարկել է «Ճգնաժամից դեպի զարգացում՝ սնվելով հաղորդակցությամբ» թեմայով ֆորումը
ՍՏԵՓԱՆԱԿԵՐՏ, մարտի 21, ԱՐՑԱԽՊՐԵՍ: Ֆորումի տարածաշրջանային նիստն անց է կացվում «From Crisis to Development - Powered by Communication» («Ճգնաժամից դեպի զարգացում՝ սնվելով հաղորդակցությամբ») թեմայով, հաղորդում է Panorama.am-ը:
Ֆորումի բացմանը Հասարակայնության հետ կապերի հայաստանյան ասոցիացիայի նախագահ Արա Սաղաթելյանն իր խոսքում ասաց. «Փաստ է, որ հաղորդակցության և դրա կառավարման կարևորությունն աշխարհում աճում է: Օրեցօր զարգացող և փոփոխվող տեղեկատվական միջավայրը ստեղծում է նոր հնարավորություններ՝ միաժամանակ առաջ բերելով նոր մարտահրավերներ: Մենք գործում ենք հետճշմարտային քաղաքականության պայմաններում՝ «post-truth politics», որը բնութագրվում է սոցիալական ցանցերի դարաշրջանում փաստերի կարևորության պայմանական նվազմամբ, որոնց փոխարեն առաջին պլան են մղվում այդ փաստերի մեկնաբանությունները և դրանց հետ կապված հույզերը: Սա տասնապատիկ ավելացնում է հաղորդակցության և դրա ուղիների կառավարիչների դերը և պատասխանատվությունը: Արդի իրականությունը վերահաստատում է մասնագիտական մոտեցումը, համաձայն որի՝ մեր աշխատանքը ոչ թե ծառայություն, այլ առաքելություն է դարձել»:
Դիմելով օտարերկրյա գործընկերներին և ներկայացնելով հայաստանյան իրականությունը՝ Արա Սաղաթելյանն ասաց. «Մեր երկրի տեղեկատվական միջավայրն ունի մի շարք առաձնահատկություններ: Մենք գտնվում են առնվազն Թուրքիայի և Ադրբեջանի բացասական քարոզչության, հակահայկական նախաձեռնությունների թիրախում: Միաժամանակ, Հայաստանում արվում է ամեն հնարավորը, որպեսզի նվազեցվի ագրեսիվ արտաքին տեղեկատվական հոսքերի բացասական ազդեցությունը հասարակության վրա: Բոլորիս համար խոսքի և մամուլի ազատությունը ու դրանց շարունակական զարգացումն այն արժեքներն են, որոնք առաջնային են ժողովրդավարական գործընթացների համատեքստում:
Հաղորդակցության և մեդիա ոլորտի մասնագետները շարունակում են փնտրել այն ուղիները, որոնց շնորհիվ լիաժեք կապահովիի տեղեկատվական հասանելիությունը, խոսքի ազատության իրավունքի իրացումն ու, միաժամանակ, տեղեկատվության փոխանակման արդյունքում անվտանգության նոր սպառնալիքներ ի հայտ չեն գա: Այս առումով հատկապես կարևորվում է իշխանության և հասարակության, քաղաքական գործընթացներին մասնակցող բոլոր ուժերի միջև շարունակական երկխոսությունը ավանդական ԶԼՄ-ների և նոր հարթակների միջոցով»:
Լրագրողների հետ զրույցում նա նաև ասաց, որ ֆորումին մասնակցում են միջազգային մակարդակի փորձագետներ, ինչը հնարավորություն կստեղծի հայաստանյան փորձագետներին գործընկերային հարաբերություններ հաստատել, ուսումնասիրել օտարերկրյա փորձագետների փորձը, որը օգտակար է և նման մասնագիտական շփումներն անհրաժեշտ են:
Իր ողջույնի խոսքում Դավոսի հաղորդակցության համաշխարհային ֆորում ասոցիացիայի նախագահ Յանինա Դուբեյկովսկայան նշեց, որ Հաղորդակցության համաշխարհային ֆորումի նպատակն այնպիսի հարթակ դառնալն է, որտեղ հնարավոր կլինի աշխարհի տարբեր ծայրերից ժամանած փորձագետների հետ միասին մասնագիտական միջավայրում քննարկել հաղորդակցության զարգացման հնարավոր ուղիները:
«Այս տարի Դավոսի հաղորդակցության համաշխարհային ֆորումը տեղի ունեցավ Ժնևում՝ լինելով ավելի երկար և ինտենսիվ: Շատ ոգևորված ենք այն փաստով, որ հնարավորություն ունեցանք ֆորումի տարածաշրջանային նիստերից մեկը կազմակերպվել նաև Երևանում: Հասարակայնության հետ կապերի հայաստանյան ասոցիացիան մեր WCF ընտանիքի անդամ է արդեն 9 տարի, և շատ ուրախ ենք, որ APRA-ի հետ համագործակցությամբ կփորձենք ընդլայնել մեր ընտանիքի սահմանները՝ այնտեղ ներգրավելով Հայաստանում ոլորտի այլ առաջատար փորձագետների և կազմակերպությունների»,- նշեց Յ. Դուբեյկովսկայան:
Տարածաշրջանում իր ձևաչափով առաջին անգամ անցկացվող ֆորումի շրջանակներում քննարկումներն անցկացվելու են 5 հիմնական նիստերի ընթացքում, որտեղ ելույթ ունեցողները կանդրադառնան ճգնաժամային հաղորդակցության, սոցիալական մեդիաների, կորպորատիվ պատասխանատվության, ազգային բրենդինգի, համայնքային զարգացման խնդիրներին:
Յուրաքանչյուր պանելում ելույթ կունենան ինչպես հայ, այնպես էլ աշխարհի 5 մայրցամաքներից ժամանած առաջատար փորձագետներ:
Կազմակերպիչների կարծիքով, ֆորումը Հայաստանի համար կլինի եզակի իրադարձություն, որը կձևավորի հաղորդակցության առանցքային միտումները՝ սահմանելով ոլորտի ապագան և ներկայացնելով հաղորդակցության, կառավարական հարաբերությունների և հանրային հարցերի լավագույն մասնագետներին:
Նպատակը: Դավոսի հաղորդակցության համաշխարհային ֆորումը մեկնարկել է 2009 թվականին՝ համաշխարհային հաղորդակցության էլիտայի առաջատար ներկայացուցիչներին և նախաձեռնող անձանց համախմբելու, հաղորդակցության հետագա զարգացման և բիզնեսում, հասարակությունում ու քաղաքականությունում դրա դերի կարևորությունը մատնանշող քննարկումների հարթակ ապահովելու համար և մի կողմից՝ բիզնեսի, ԶԼՄ-ների ու հասարակության, մյուս կողմից՝ պետության միջև փոխգործակցության ձևի և բովանդակության խորքային վերլուծության խթանման համար:
Լսարանը: Երկօրյա գիտաժողովը համախմբում է մեծ թվով պատվիրակների և հսկայական առցանց լսարանի ամբողջ աշխարհից՝ PR խորհրդատվական ընկերությունների սեփականատերեր կամ ղեկավարներ, բարձրաստիճան պաշտոնյաներ, կորպորատիվ հարցերի, մարքեթինգի, միջազգային հարաբերությունների, մեդիայի հմուտ մասնագետներ, բլոգերներ, պետական պաշտոնյաներ և առաջատար նորարարական կենտրոնների գիտնականներ: Տվյալ ամենամյա ֆորումի ընթացքում, որն անց է կացվել արդեն 7 անգամ, համախմբվում են առաջատար մասնագետներ աշխարհի 58 երկրներից: 200+ խորհրդատվական ընկերությունների, տարբեր բիզնես ոլորտների 125+ ընկերությունների ներկայացուցիչներ, 125 գործընկերներ (որոնց թվում՝ 15 խոշոր միջազգային կազմակերպություններ) և ավելի քան 12 նախարարություններ իրենց ավանդն են ներդրել ֆորումի բովանդակային կայացման հարցում: