Նորվեգիայից եկած «Լիդերհորն» երգչախմբի անդամները Հայաստանում ծանոթացան հայկական պատմության էջերին:
Հայաստան եկած նորվեգական երգչախումբը հաղթահարել էր հայերեն երգեր սովորելու դժվարությունը
ՍՏԵՓԱՆԱԿԵՐՏ, 12 ապրիլի, ԱՐՑԱԽՊՐԵՍ: Երգչախումբը ապրիլի 12-ին ցեղասպանության հուշահամալիրում կատարեց հոգևոր երգեր և հարգանքի տուրք մատուցեց Եղեռնի զոհերի հիշատակին:
«Ավանդույթ է դարձել արդեն, որ ամեն տարի ապրիլի 24-ին Բերգեն քաղաքի «Լիդերհորն» երգչախումբը երգում է խաչքարի մոտ: Այս տարի եկանք Հայաստան: Ապրիլի 24-ին չենք եկել, որ շատ մարդ չլինի: Իրենք հասցնեն տեսնել, ծանոթանալ Հայաստանին: Միտքն առաջացել է դեռ երկու տարի առաջ: Երգչախմբի անդամները շատ էին լսել Հայաստանի մասին, բայց չգիտեին, թե որտեղ է այն: Որոշեցի նրանց բերել Հայաստան, որպեսզի հետո իմանան և իրենց ընկերներին էլ կարողանան ցույց տալ, թե քարտեզի վրա որտեղ է Հայաստանը: Շատերն իրենց հետ բերել են նաև ընկերներին: Մենք՝ մայրս, մեր բարեկա մները, գտել ենք նրանց համապատասխան հայկական երգեր՝ «էրեբունի Երևան», Կոմիտասի երգերից և այլն»,-ասաց նորվեգական մշակութային ընկերակցության անդամ, կազմակերպիչ Մարտին Դավթյանը:
Նրա խոսքով`երգչախումբը բաղկացած է մոտ յոթանասուն հոգուց, բայց Հայաստան են եկել նրանցից քառասունը: «Լիդերհորն»-ը ճամփորդությունների աշխարհագրությունը ներառում է Աֆրիկան, Կուբան, Պաղեստինը: Պաղեստինում նրանք լսել են հայկական երգ, որից հետո էլ հետաքրքրվել են Հայաստանով ու հայկական երգերով:
«Մենք եկել ենք Բերգենից, որը քաղաք է Նորվեգիայի արևմտյան ափում և շրջապատված է լեռներով, ինչպես Հայաստանը: Այնպես, որ մեզ հոգեհարազատ է այս երկիրը: Ձեզ կուղեկցենք երաժշտական ճամփորդության, որը սկիզբ է առել Նորվեգիայից և հասել է Հայաստան»,- նշեց երգչախմբի ներկայացուցիչը:
«Լիդերհորն»-ը կատարեց 4 հայերեն, մի քանի նորվեգերեն և այն երկրների լեզվով երգեր, որտեղ, որ եղել էին: Կատարեցին նաև մեկ շվեդական երգ, որի երաժշտությունը հայկական էր:
Երգչախմբի տենոր, երգիչ Ռյունե Քրիստիան Դահլի խոսքով` «Լիդերհորն»-ը սկսել է գործել 1973 թվականից: Սկզբնական շրջանում անդամները եղել են ուսանողներ, ովքեր պայքարել են վիետնամական պատերազմի դեմ: «Մենք հայկական պատմության մասին շատ քիչ բան գիտենք դպրոցից: Բայց երբ մենք ծանոթացանք Մարտին Դավթյանի, իր ընտանիքի հետ և առաջին անգամ միացանք ապրիլի 24-ի հիշատակի օրվան, շատ բան սովորեցինք հայոց պատմության մասին: Իսկ հիմա, երբ Հայաստանում ենք, հասկացանք, որ շատ քիչ բան գիտեինք այս երկրի մասին»,-ասաց Ռյունե Քրիստիան Դահլը և նշեց, որ հայերե? ? երգեր սովորելն այնքան էլ հեշտ չէր, բայց ամռանը հայ ընկերների օգնությամբ կարողացել են սովորել երգերի հայերեն բառերը:
«Շատ ուրախ ենք այսպիսի ջերմ ընդունելության համար: Մեր հայերեն երգերից բոլորը հուզվում են այստեղ, մենք ևս հուզված ենք: Երբ մեր աչքով ենք տեսնում Հայաստանը, երգելիս զգացողություններն ավելի տպավորիչ են լինում: Երեկ Կոմիտասի թանգարանում ելույթի ժամանակ շատ բան սովորեցինք նրա մասին ևս»,-ասաց երգչախմբի դիրիժոր Ռիկկե Լինա Սորելլ Մաթիսոնը:
«Լիդերհորն»-ը վաղը` մարտի 13-ին, ելույթ կունենա նաև Արամ Խաչատրյան համերգասրահում:
