Այսօր Արցախի պետական համալսարանում կազմակերպվել է արիության դաս՝ նվիրված մայիսյան եռատոնին:
Արցախի պետական համալսարանում կազմակերպվել է արիության դաս
ՍՏԵՓԱՆԱԿԵՐՏ, 6 մայիսի, ԱՐՑԱԽՊՐԵՍ: ԱՀ պաշտպանության նախարար Լևոն Մնացականյանը, կրթության, գիտության և սպորտի նախարար Սլավա Սարգսյանը և ԱրՊՀ ռեկտոր Մանուշ Մինասյանը և այլք մինչ միջոցառման սկսվելը ծաղիկներ են խոնարհել Արցախյան ազատամարտում ԱրՊՀ-ի զոհված ուսանողների հիշատակը հավերժացնող հուշաքարին:
«Արցախպրես»-ի թղթակցի հաղորդմամբ՝ միջոցառմանը բացման խոսքով հանդես է եկել ԱրՊՀ ռեկտոր Մանուշ Մինասյանը, ով, ողջունելով ներկաներին, ասել է, որ արդեն բարի ավանդույթ է դարձել, Մայիսի 9-ին ընդառաջ, կրթական հաստատություններում կազմակերպել արիության դասեր:
Պաշտպանության նախարար Լ. Մնացականյանն իր ելույթում նախ ասել է, որ միջոցառումը նպատակ է հետապնդում՝ ներկայացնել պաշտպանության բանակում իրականացված գործերը և կատարվելիք ծրագրերը: Նա իր խոսքում մասնավորապես պատմել է պաշպանության բանակի կազմավորման գործընթացի մասին ՝ սկած արցախյան գոյապայքարից մինչև այսօր: Անդրադառնալով ապրիլյան իրադարձություններին և առաջնագծի այսօրվա իրավիճակին՝ նախարարը նշել է, որ այդ օրերին թշնամին գործել է նախադեպը չունեցող ինտենսիվությամբ՝ օգտագործելով իր ձեռքի տակ ունեցող բոլոր հնարավորությունները. «Հակառակորդը այդ օրերին կիրառել է մոտ 70- 80 հազար արկ, որը կազմում է արցախյան ազատամարտի ընթացքում նրանց կողմից կիրառած արկերի մեկ քառորդը: Այժմ մենք կարողանում ենք հակառակորդի ամեն մի քայլին տալ է համարժեք պատասխան. այսօր առաջնագծում թելադրող կողմը միայն մեր պաշտպանության բանակի զինծառայողն է»:
ՊԲ հրամանատարը խոսել է վերջին ժամանակահատվածում բանակում կատարված մասշտաբի ինժեներատեխնիկական աշխատանքների մասին և ընդգծել, որ իրենք շարունակում են ավելի համալրել բանակը՝ ապահովելով ժամանակակից զինտեխնիկայով և բանակին անհրաժեշտ այլ պարագաներով. «Մինչ տարվա վերջ կունենանք արդի տեխնոլոգիաներով հագեցված նոր միջոցներ, և մենք ընդհանուր համակարգված մոտեցմամբ, կամրապնդենք մեր բանակի հզորությունը՝ դրանով մեր հակառակորդին պարտադրելով համաձայնել այն պայմաններին, որոնք կառաջարկենք մենք»,- մասնավորապես ասել է Լ. Մնացականյանը և հավելել, որ այսօր բանակը համագործակցում է բուհական հաստատությունների հետ և փորձում տարբեր ոլորտներում բանակի համար պատրաստել լավ մասնագետներ: ԱՀ կրթության, գիտության և սպորտի նախարար Սլավա Ասրյանն էլ իր ելույթում ասել է, որ բանակի հետ կրթական հաստատությունների կապը դրված է բավականին ամուր հիմքերի վրա և, որ արդեն քննարկման փուլում է բարձրագույն ուսումնական հաստատություններում ռազմական ամբիոնների ստեղծման հարցը:
