Երևանում անցկացվեց «ԵԱՏՄ շրջանակում Ռուսաստանի Դաշնության և Հայաստանի Հանրապետության ներկայացուցիչների գործակցության հեռանկարները ոսկերչության և թանկարժեք մետաղների բնագավառում» խորագրով կլոր սեղան-քննարկում:
Հայ և ռուս պաշտոնյաները քննարկեցին երկրների միջև ոսկերչական ոլորտի գործակցության հեռանկարները
ՍՏԵՓԱՆԱԿԵՐՏ, 18 մայիսի, ԱՐՑԱԽՊՐԵՍ-ԱՐՄԵՆՊՐԵՍ: Միջոցառման նպատակն է ԵԱՏՄ անդամ երկրների տարածքում արտադրված ոսկերչական արտադրանքի հարգադրոշմների փոխադարձ ճանաչման խնդրի, ինչպես նաև պետություն-մասնավոր հատված գործակցության ակտիվացման հարցերի քննարկումը: Կլոր սեղան-քննարկումը կազմակերպվել էր ԵԱՏՄ ոսկերիչների ասոցիացիայի և ՌԴ-ում Հայաստանի առևտրական ներկայացուցչի նախաձեռնությամբ:
ՀՀ տնտեսական զարգացման և ներդրումների նախարարի տեղակալ Հովհաննես Ազիզյանի խոսքով` թանկարժեք մետաղների բնագավառը Հայաստանի համար համարվում է առաջնային զարգացման ոլորտներից մեկը և ԵԱՏՄ տարածքը միասնական հարթակ է, որտեղ կարելի է դիտարկել այն հարցերը, որոնք կարող են նպաստել անդամ երկրների փոխգործակցությանը:
«Այսպիսի միջոցառումների կազմակերպումը հնարավորություններ կընձեռի ոչ միայն ներքին առևտրի, այլ նաև երրորդ երկրների հետ մեր արտադրանքների տարածմանը: Այս կոնտեքստում առաջնահերթություն է միասնական աշխատանքներ իրականացնել, տեսնել թե ինչ խնդիրներ կան ոլորտում և ինչ հնարավորություններ կան ԵԱՏՄ անդամ երկրների մոտ այդ հարթակում աշխատելու համար, որպեսզի վերացվեն պատնեշները»,- ասաց փոխնախարարը` կարծիք հայտնելով, որ կան որոշ խոչընդոտներ և քննարկման ժամանակ հնարավոր կլինի գալ դրանց հաղթահարման ուղղությամբ միասնական որոշումների կայացմանը:
ՀՀ ֆինանսների նախարարի տեղակալ Կարեն Թամազյանը նշեց, որ կլոր սեղան քննարկման ժամանակ բարձրացված խնդիրները հնարավորություն կտան ԵԱՏՄ-ի բարձրագույն մարմիններին դրանց լուծումների վերաբերյալ որոշումներ կայացնել:
«Իսկապես մենք պետք է օգտագործենք մեր բոլոր հնարավորությունները ոսկերչական արտադրանքների վերաբերյալ միասնական շուկա ստեղծելու ուղղությամբ: Այն շահավետ կլինի թե մեծ թե փոքր պետություններին, երբ մի երկրի ոսկերչական արտադրանքն ընդունված կլինի տարբեր երկրներում»,- ասաց Թամազյանը:
ՀՀ տնտեսական զարգացման և ներդրումների նախարարի խորհրդական Գագիկ Մկրտչյանի տեղեկացմամբ` ԵԱՏՄ տարածքում գոյություն ունի հարգադրոշմների և հարգորոշման փոխադարձ ճանաչելիության խնդիրը, որը շատ կարևոր է գործարարների համար: Նրա խոսքով` հարգադրոշմների և հարգորոշման փոխադարձ ճանաչելիությունը շատ կօգնի գործարարներին հետագա համագործակցության համար,
«Օրակարգում ունենք 6-7 խնդիրներ, որոնք վերաբերվում են արտահանման, ներմուծման, փոխադարձ համագործակցության, տոլինգի հետ կապված հարցերին, ինչպես նաև ազատ տնտեսական գոտիներին: Մի հարց էլ կա, որը հետաքրքրում է ՌԴ-ին, այն վերաբերվում է Իրանի հետ համագործակցությանը: Այսօրվա միջոցառմանը որևէ որոշում չի ընդունվելու, այլ ընդամենը կարծիքների փոխանակում է, որից հետո համապատասխան կառավարությունները համաձայնագրի քննարկման ժամանակ կունենան իրենց ավելի հստակ պատկերացումները կապված բիզնեսի ներկայացուցիչների դիրքորոշումներին»,- ասաց Մկրտչյանը:
ՌԴ-ում Հայաստանի առևտրական ներկայացուցիչ Կարեն Ասոյանի կարծիքով` ռուսաստանյան շուկան ամենակարևորն է մեզ համար, և կան խնդիրներ, որոնք պետք է լուծել ապրանքների ներմուծման համար: «Այսօրվա նիստում քննարկվելու է հարգադրոշմների և հարգորոշման փոխադարձ ճանաչումը, ինչը կարևոր է փոքր և միջին արտադրողների համար, քանի որ նրանք չունեն ՌԴ-ում սպասելու և ֆինանսական միջոցների հնարավորություններ»,- ասաց Ասոյանը` հավելելով, որ քննարկվելու են նաև Իրանի շուկայում աշխատելու հեռանկարները: Նա հույս հայտնեց, որ ռուս և հայ գործարարները միջոցառմանը ծանոթանալու շնորհիվ կստեղծեն համատեղ գործարաններ, որտեղ ամեն մի երկիր կունենա իր առանձնահատկությունները:
