Անգլիական «Մանչեսթեր Յունայթեդի» եւ Հայաստանի հավաքականի կիսապաշտպան Հենրիխ Մխիթարյանը խոսել է Ամստերդամի «Այաքսի» դեմ Եվրոպայի լիգայի եզրափակիչ խաղի մասին:
Հենրիխ Մխիթարյան. «Այաքսի» հետ խաղն ամենակարեւորներից է իմ կյանքում
ՍՏԵՓԱՆԱԿԵՐՏ, 20 մայիսի, ԱՐՑԱԽՊՐԵՍ: «Մենք ցանկանում ենք հաղթել եւ պետք է հաղթենք Եվրոպայի լիգայում: Մեզ համար շատ կարեւոր է նվաճել տիտղոս, ինչպես նաեւ հնարավորություն ստանալ խաղալ Չեմպիոնների լիգայում: «Մանչեսթեր Յունայթեդն» այն թիմը չէ, որը 3 տարի անընդմեջ պետք է խաղա Եվրոպայի լիգայում:
Դա իմ կյանքի ամենակարեւոր խաղերից մեկն է: Ես չեմ ցանկանում կորցնել այդ հնարավորությունը: Միայն մտածում եմ այդ խաղում հաղթելու մասին: Գիտեմ, որ մենք ի վիճակի ենք անել դա: Եթե մենք հաղթենք Եվրոպայի լիգայի եզրափակիչում, ապա սա հիանալի մրցաշրջան կլինի մեզ համար, քանի որ արդեն նվաճել ենք 2 տիտղոս, եւ սա կլինի երրորդը:
Ես չեմ նյարդայնանում, քանի որ արդեն երեխա չեմ: Գիտեմ, թե ինչպես պետք է հաղթահարել ճնշումը, ինչպես պատրաստ լինել խաղին: Պարզապես պետք է ցուցադրեմ իմ խաղը եւ լինեմ այնպիսին, ինչպիսին որ կամ:
Դիտել եմ «Այաքսի» մասնակցությամբ մի քանի խաղեր: Նրանք երիտասարդ թիմ են, եւ ունեն անհատապես լավ պատրաստ ֆուտբոլիստներ: Կարող եմ ասել, որ նրանք շատ ագրեսիվ են եւ կփորձեն խաղալ այն ֆուտբոլը, որին սովոր են:
Անգլիայում իմ առաջին մրցաշրջանն այնքան էլ հեշտ չէր, քանի որ սկզբում ես պայքար ունեցա, բայց դա ֆուտբոլի մի մասն է: Շարունակեցի ջանասիրաբար աշխատել եւ, սպասելով իմ երկրորդ շանսին, շատ լավ օգտագործեցի այն: Ես օգտագործեցի դա, եւ սկսվեցին լավ ժամանակները: Սա վատ տարի չէր, նորմալ տարի էր: Գուցե ես ի վիճակի էի անել ավելին, սակայն այս տարվա համար դա էլ վատ չէր: Հաջորդ մրցաշրջանում կփորձեմ անել ավելին:
Իհարկե, ես միշտ լավատես եմ եւ գիտեմ, որ կարող եմ անել ավելին: «Մանչեսթեր Յունայթեդն» ունի մեծ ամբիցիաներ եւ միշտ ձգտում է հասնել առավելագույնին: Ինձ դուր են գալիս նոր մարտահրավերները»,- Մխիթարյանի խոսքը մեջբերում է»,- Sky Sports-ը:
Հիշեցնենք, որ Եվրոպայի լիգայի եզրափակիչը կկայանա մայիսի 24-ին Ստոքհոլմի «Ֆրենդս Արենա» ստադիոնում: Հոլանդական ակումբը եվրագավաթների եզրափակիչում նախորդ անգամ հանդես եկել է 1996-ին: Եվրոպայի լիգայի հաղթողը նվաճում է Չեմպիոնների լիգայի խմբային փուլի ուղեգիր:
