Արցախում այսօր մեկնարկել են միասնական քննությունները` կենսաբանություն, աշխարհագրություն և համաշխարհային պատմություն առարկաներից:
Արցախում մեկնարկել են միասնական քննությունները
ՍՏԵՓԱՆԱԿԵՐՏ, 2 հունիսի, ԱՐՑԱԽՊՐԵՍ: «Արցախպրես»-ի թղթակցի հետ զրույցում ԱՀ գնահատման և թեստավորման կենտրոնի (ԳԹԿ) փոխտնօրեն Մետաքսե Հակոբյանն ասել է, որ կենսաբանություն առարկայի մասնակիցների թիվը 69 է, աշխարհագրություն առարկայից՝ 16, իսկ համաշխարհային պատմություն առարկայի քննությանը մասնակցում է 4 դիմորդ:
«Այսօրվա քննություններին ընդհանուր մասնակցում են 89 դիմորդ, որոնց համար նախատեսված է 2 քննական կենտրոն»,-նշել է Մ. Հակոբյանը և տեղեկացրել, որ ամենաշատ դիմորդները հայտագրվել են հայոց լեզու և գրականություն միասնական քննությանը:
«Քննության ընթացքը բավականին հանգիստ է, որևէ դժգոհություն չկա և աշակերտների համար բոլոր պայմանները նախատեսված են: Բողոքներ չեն արձանագրվել: Տպագրական թերությունները չենք քննարկում առաջադրանքներում»,- ասել է Մ. Հակոբյանը և հավելել, որ քննության անցկացման համար նախատեսված է 3 ժամ:
«Յուրաքանչյուր քննությունից հետո դիմորդն իրավունք ունի իր պատասխանների ձևաթուղթը պատճենահանի և վերցնի: Քննությունից 2 ժամ հետո արդյունքներն արդեն տեղադրված են լինում http://www.atc.am/ կայքում, որտեղ դիմորդը կարող է ստուգել իր պատասխաները` նախապես իմանալով արդյունքները»,- տեղեկացրել է Մ. Հակոբյանը և հավելել, որ ըստ կարգի յուրաքանչյուր քննությունից հինգ օր հետո արդյունքները պաշտոնապես հրապարակվում են:
Հադրութի շրջանի Տողի Վիգեն Գրիգորյանի անվան միջնակարգ դպրոցի աշակերտուհի Արմինե Հասինյանը, ով համաշխարհային պատմություն առարկայից մասնակցել է միասնական քննությանը մեզ հետ զրույցում ասել է. «Հարցերը հեշտ էին, քանի որ այդ թեմաները մենք ուսումնասիրել ենք դպրոցում: Բողոքներ, դժգոհություններ չունեմ, ամեն ինչ անցել է հանգիստ, խանգարողներ, օգնողներ չեն եղել ոչ մեկին: Ուզում եմ դառնալ պատմաբան և հույս ունեմ, որ բարձր միավորներ կվաստակեմ»:
Նշենք, որ միասնական հաջորդ քննությունը տեղի է ունենալու հունիս 6-ին Հայոց լեզու և հայ գրականություն առարկայից:
