Օրերս Ռուս-հայկական կազմակերպությունների համակարգող խորհրդում ընդգրկված կազմակերպությունների ղեկավարները հանդիպում են անցկացրել Մոսկվայում, որտեղ ընտրվել է ռուս-հայկական կազմակերպությունների համակարգող խորհրդի նոր ղեկավարությունը:
Մոսկվայում ընտրվել է ռուս-հայկական կազմակերպությունների համակարգող խորհրդի նոր ղեկավարությունը
ՍՏԵՓԱՆԱԿԵՐՏ, 12 հունիսի, ԱՐՑԱԽՊՐԵՍ: Կազմակերպությունից հայտնում են, որ այդ հանդիպմանը խորհուրդը մասնավորապես, քննարկել է ոչ միայն իրենց գործունեության հաջողություններն ու ձեռքբերումները, այլեւ հիմնական խնդիրները, որոնք հուզում են հասարակությանը:
«Իր գործունեության մեկ տարվա ընթացքում Ռուս-հայկական կազմակերպությունների համակարգող խորհուրդը վերածվել է Ռուսաստանի հայերի շահերի պաշտպանության ակտիվ պայքարի առաջամարտիկի, իսկ Խորհրդի տեղեկատվական հովանավորը՝ russia-armenia.info կայքն է որը ղեկավարում են Արամ Խաչատրյանն ու Ալեքսանդր Երկանյանը:
Ելույթ ունեցողները նշել են, որ Ռուս-հայկական կազմակերպությունների համակարգող խորհուրդը իր ներդրումն է ունենում եւ կշարունակի ունենալ հայ-ռուսական բազմադարյա բարեկամության ամրապնդման գործում, նպաստելու է ռուսական հասարակության տարբեր շերտերի միջեւ փոխգործակցության զարգացմանը, անելու է հնարավոր ամեն բան Ռուսաստանի կյանքում հայ համայնքի մեծ դերի մասին արժանահավատ տեղեկատվության տարածմանը թե նախկինում, թե հիմա: Հանդիպման մասնակիցները սկայպով ուղիղ կապ են հաստատել Ռուսաստանի այլ տարածաշրջաններում գտնվողն իրենց գործընկերների հետ:
Հանդիպման մասնակիցների որոշմամբ ձեւավորվել է նոր պաշտոն՝ Ռուս-հայկական կազմակերպությունների համակարգող խորհրդի գլխավոր քարտուղար: Այդ պաշտոնում ընտրվել է Արամ Խաչատրյանը, իսկ պատասխանատու քարտուղար է ընտրվել Ալեքսանդր Երկանյանը»,-ասված է տարածված հաղորդագրության մեջ:
Նշենք, որ Ռուս-հայկական կազմակերպությունների համակարգող խորհրդում ընդգրկված են հայ համայնքը ներկայացնող 25 կազմակերպություններ: