«Երևանյան հեռանկարներ» 18-րդ միջազգային երաժշտական փառատոնի շրջանակում հունիսի 15-ին Արամ Խաչատրյան համերգասրահում կայացավ Ռուսաստանի պետական ակադեմիական Պ.Ի. Չայկովսկու անվան մեծ սիմֆոնիկ նվագախմբի համերգը՝ հանրահայտ դիրիժոր Վլադիմիր Ֆեդոսեևի ղեկավարությամբ:
Պ.Ի. Չայկովսկու անվան սիմֆոնիկ նվագախումբը ելույթ ունեցավ հայ երաժշտասերների առաջ
ՍՏԵՓԱՆԱԿԵՐՏ, 15 հունիսի, ԱՐՑԱԽՊՐԵՍ-ԱՐՄԵՆՊՐԵՍ: «Հիանալի տրամադրություն ունենք, քանի որ հանդիպել ենք մեր ընկերներին: Նշեմ, որ երբեք չենք կորցրել հոգևոր կապը հայ ժողովրդի և հայ մշակույթի հետ: Ներկայացնելու ենք կոմպոզիտոր Արամ Խաչատրյանի ստեղծագործությունները, որոնք բխում են հայ ժողովրդի հոգուց: Ինձ համար կարևոր է նաև Չայկովսկու 5-րդ սիմֆոնիան հնչեցնելը, որը արտակարգ գործ է և ամեն անգամ կարելի է նորություն գտնել նրանում»,- նշեց դիրիժոր Վլադիմիր Ֆեդոսեևը:
«Երևանյան հեռանկարներ» փառատոնի կազմակերպիչ Սոնա Հովհաննիսյանի խոսքով` փառատոնը լուրջ ձեռքբերում է մեր մշակութային կյանքում: «Փառատոնի շրջանակում հնարավորություն ունենք հյուրընկալել այս հիանալի նվագախմբին ու լեգենդար դիրիժորին, ինչը շատ կարևոր է: Կարծում եմ` երաժշտասերները մեծ բավականություն կստանան համերգից»,-ասաց նա:
Նվագախմբի հետ ելույթ ունեցավ նաև երիտասարդ, տաղանդաշատ ջութակահարուհի Դիանա Ադամյանը:
«Հնարավորություն եմ ունեցել ելույթներ ունենալ տարբեր նխվագախմբերի հետ, բայց Չայկովսկու անվան սիմֆոնիկ նվագախմբի հետ հանդես գալու մասին անգամ չէի կարող երազել: Մեր համագործակցությունը ստացվել է, խնդիրներ չեն առաջացել ու ես մեծ պատասխանատվությամբ եմ մոտենում այս ելույթին»,-շեշտեց Դիանա Ադամյանը:
Հանդիսատեսը սիրով էր ունկնդրում նվագախմբի կատարուները և բուռն ծափահարություններով արձագանքում դրանց:
Համերգից առաջ ՀՀ մշակույթի նախարարությունը ոսկե մեդալ շնորհեց դիրիժոր Վլադիմիր Ֆեդոսեևին:
Իննսունամյա պատմություն ունեցող նվագախումբն իր պատմության ընթացքում ղեկավարել են Լորիս Մաազելը, Կուրս Մաազուրը և այլք: 1974 թվականից այն ղեկավարում է Վլադիմիր Ֆեոդոսևը: Նվագախմբի հետ նա բացահայտել է Եվգենի Կիսինին, Մաքսիմ Վենգերովին, Վադիմ Րեպինին: Մաեստրոն 1995-2004 թվականներին հանդիսացել է Վիեննայի սիմֆոնիկ նվագախմբի գլխավոր դիրիժոր, Տոկիոյի ֆիլհարմոնիկ նվագախմբի առաջին հրավիրյալ դիրիժոր:
Պ. Ի. Չայկովսկու անունը նվագախմբին շնորհվել է 1993 թվականից` կոմպոզիտորի ստեղծագործությունների լավագույն ու խորաթափանց կատարումների համար:
«Երևանյան հեռանկարներ» փառատոնի բացումը տեղի է ունեցել մարտի 26-ին Արամ Խաչատրյան համերգասրահում լեգենդար ջութակահար, կրկնակի Գրեմմի մրցանակակիր Պինկաս Ցուկերմանի համերգային ծրագրով: Փառատոնի շրջանակում Երևան կժամանեն Իսրայելի կամերային նվագախումբը, հռչակավոր դաշնակահար Արկադի Վոլոդոսը:
Փառատոնն անցկացվում է ՀՀ Նախագահ Սերժ Սարգսյանի բարձր հովանու ներքո, ՀՀ մշակույթի նախարարության և Երևանի քաղաքապետարանի աջակցությամբ: