Օրերս նավթի Brent տեսակի համաշխարհային գները անցան մեկ բարելի դիմաց 45 դոլարի շեմը:
Նավթի Brent տեսակի համաշխարհային գները նորից սկսել են աճել
ՍՏԵՓԱՆԱԿԵՐՏ, 25 հունիսի, ԱՐՑԱԽՊՐԵՍ: Հայտնի է, որ ռուսական Urals նավթի գները որոշվում են՝ ելնելով Brent-ի գնից: Նավթը Ռուսաստանի արտահանման ընդհանուր ծավալներում առաջատար դեր ունի: Urals-ի մասնաբաժինը ռուսական նավթի արտահանման ծավալներում գերազանցում է 80%-ը:
Վերջին տարիներին Ռուսաստանում դոլարի փոխարժեքը որոշակիորեն կախված էր նավթի համաշխարհային գներից: Նավթի համաշխարհայի գների բազմակի նվազումը հանգեցրեց ռուսական ռուբլու զգալի թուլացման: Դա, իր հերթին, մի շարք բացասական հետեւանքներ ունեցավ երկրի տնտեսության համար:
Բոլորին է հայտնի, որ Ռուսաստանը մեր մի շարք ապրանքների խոշոր ներկրողն է (մասնավորապես՝ կոնյակի, իսկ բերքահավաքի սեզոնին՝ նաեւ մրգերի ու բանջարեղենի), այնտեղ մեր աշխատանքային միգրանտների մի ամբողջ բանակ կա: Այդ պատճառով Ռուսաստանի տնտեսությունում լուրջ փոփոխություններն ազդում են նաեւ մեր երկրի վրա:
Երկու տարի առաջ նավթի համաշխարհային գների շուրջ մասնագետների կանխատեսումները տատանվում էին մեկ բարելի դիմաց 25-100 դոլարի միջակայքում: Իրականում ֆյուչերսների գները, ասենք՝ նույն Brent-ի, երկար ժամանակ տատանվում էին 50-60 դոլարի միջակայքում: Եվ ահա հունիսի 5-ից Brent տեսակի նավթի միջին օրական գները նվազել են 50 դոլարից եւ հունիսի 21-ին ասել այս ամսվա նվազագույնին (44.77 դոլար):
Սխալ կլիներ կարծել, որ գները ձեւավորվում են որեւէ օբյեկտիվ եւ հստակ հաշվարկների հիման վրա: Այդ պրոցեսն ավելի շատ տարերային բնույթ ունի, եւ գներում տատանումները հաճախ տարբեր նորությունների հետեւանք են լինում:
Բանն այն է, որ բորսայում գրանցման ոչ բարդ գործընթացն ու դյուրությամբ փող աշխատելու հնարավորությունը գրավում է բազմաթիվ սպեկուլյանտների: Հասկանալի է, որ այդ «խաղացողները» հետաքրքրված են հենց կարճաժամկետ պայմանագրերով: Ասենք՝ երկու ամսվա, արագորեն շահույթ ստանալու համար: Բացի այդ՝ գների կարճաժամկետ «կանխատեսումից» սխալվելու վտանգն ավելի փոքր է, քան երկարաժամկետ պայմանագրերի պարագայում:
Բորսան արագորեն արձագանքեց հունիսի 22-ին գների «թեթեւակի» աճին, եւ այդ օրը Brent տեսակի նավթի ծավալները կնքված պայմանագրերով նախորդ տարվա ցուցանիշից շատ ավելին էին: Հասկանալի է, որ ֆյուչերսների բազմաթիվ գնորդներ նվազագույն գներ էին կանխատեսում, եւ գնումների համար ազդանշան հանդիսացավ գների հետեւողական նվազմանը հետեւած առաջին իսկ աճը:
Առաջիկայում նավթի համաշխարհային գները կարող են ձեւավորվել պահանջարկի հանդեպ առաջարկի հնարավոր գերազանցման պայմաններում: Մասնավորապես, ակնկալվում է ԱՄՆ-ում նավթի արդյունահանման հետագա աճ, ինչը կարող է բացասաբար անդրադառնալ նավթի համաշխարհային գները կայունացնելու՝ ՕՊԵԿ-ի անդամ պետությունների փորձերի վրա:
