Այսօր Արցախի գիտական կենտրոնի նիստերի դահլիճում տեղի է ունեցել կենտրոնի հիմնադիր-տնօրեն, տեխնիկական գիտությունների դոկտոր, ՌԴ ակադեմիկոս Սեմյոն Բաբայանի ծննդյան 85-ամյակը:
Արցախի գիտական կենտրոնում նշվել է կենտրոնի հիմնադիր-տնօրենի հոբելյանը
ՍՏԵՓԱՆԱԿԵՐՏ, 21 հուլիսի, ԱՐՑԱԽՊՐԵՍ:Ըստ «Արցախպրես»-ի թղթակցի հաղորդման՝ միջոցառմանը բացման խոսքով հանդես է եկել կենտրոնի տնօրեն Ստեփան Դադայանը՝ նշելով, որՍ. Բաբայանն Արցախի Հանրապետությունում և նրա սահմաններից դուրս միշտ էլ մեծ հարգանք է վայելել:
Կենտրոնի տնօրենը կոլեկտիվի անունից շնորհավորել է հոբելյարին, ցանկացել նրան առողջություն, հաջողություն և երկարակեցություն:
«Ձեր անցած հարուստ տարիների փորձը վկայում է, որ Դուք իրականացնում եք հասարակական մեծ աշխատանք»,- մասնավորապես ասել է Ս. Դադայանը:
Արցախի գիտական կենտրոնի քարտուղար Վալերի Ալեքսանյանը ևս շնորհավորել և բարեմաղթանքներ է հղել Ս. Բաբայանին՝ ներկայացնելով նրա կյանքի հարուստ էջերը:
ԱՀ Ազգային Ժողովի փոխխոսնակ, պատմական գիտությունների դոկտոր Վահրամ Բալայանը, խոսելով Ս. Բաբայանի մասին, ըստ էության ասել է. «Աշխատելով տարբեր կոլեկտիվներում՝ նա իր կատարած բոլոր աշխատանքներում էլ նորամուծություններ է մտցրել: Իր համեստ բնավորությամբ, խառնվածքով, գործելաոճով նկատելի հետք է թողել. այսօր էլ նա շարունակում է երիտասարդների համար լավ օրինակ հանդիսանալ»:
Արցախի պետական համալսարանի բանասիրական գիտությունների թեկնածու, պրոֆեսոր Օֆելյա Բաբայանն էլ, խոսելով Բաբայան գերդաստանի մարդկային հատկանիշների մասին, մասնավորապես ասել է. «Իրոք, նա արժանի է մեծարման և գնահատանքի: Շնորհավորում ենք ծնունդդ՝ արժանավոր գերդաստանի արժանի զավակ»:
Իսկ ԱրՊՀ մանկավարժական գիտությունների թեկնածու,պրոֆեսոր Արկադի Թովմասյանն էլ նշել է, որ իր համար մեծ պատիվ է ու պարծանք՝ ճանաչել գիտնական խելացի մարդուն, վայելել նրա մտերմությունը:
Արցախի գիտական կենտրոնի աշխատակիցները խոսելով Ս. Բաբայանի մարդկային բարձր արժեքների մասին, ըստ էության ասել են. «Դուք եղել եք քաղաքական ու հասարակական գործիչ. դժվար ու պատասխանատու է եղել ձեր աշխատանքային ուղին, դուք կարողացել եք արժանապատվորեն կատարել Ձեր առջև դրված խնդիրները՝ վաստակելով մեծ սեր ու հարգանք: Ձեր ազգասիրական ու հայրենասիրական գաղափարները, լավատեսությունն ու բարությունը, ձեր շրջապատի մարդկանց հանդեպ ունեցած մոտեցումները հազվադեպ հանդիպող մարդկային արժեքներ են»:
Վերջում Սեմյոն Բաբայանը շնորհակալություն է հայտնել իր հասցեին ասված անկեղծ վերաբերմունքի ու ջերմ խոսքերի համար. «Ես իմ ամենակարևոր աշխատանքներն իրականացրել եմ այստեղ. Արցախում աշխատել եմ տարբեր ոլորտներում. ես ամեն ինչ արել և անում եմ հանուն իմ երկրի, հանուն հայ ժողովրդի»:
Միջոցառմանը ներկա էին կենտրոնի աշխատակիցներ, հարազատներ, գործընկերներ և այլք:
Նշենք, որ Սեմյոն Հմայակի Բաբայանը ծնվել է 1932 թվականի հուլիսի 21-ին Բաքու քաղաքում:
Սովորել ու ոսկե մեդալով ավարտել է թիվ 160 միջնակարգ դպրոցը, այնուհետև ընդունվել ու գերազանցությամբ ավարտել է տեղի նավթի ու քիմիայի ինստիտուտը: 1973 թվականին տեղափոխվել է Երևան և աշխատանքի է անցել մետաղահատ հաստոցների և սարքավորումների փորձարարական ինստիտուտի անդրկովկասյան բաժանմունքում, որպես բաժնի պետ-տնօրենի տեղակալ:
1984 թվականին հրավիրվել է Ստեփանակերտ և տեղափոխման կարգով նշանակվել, որպես նոր կառուցվող գյուղ-մեքենաների գործարանի տնօրեն:
1988 թվականի օգոստոսի 24-ին նշանակվել է ԼՂԻՄ-ի ժողովրդական պատգամավորների մարզգործկոմի նախագահ, միաժամանակ մինչև 1991 թվականի հուլի ամիսն ընդգրկված լինելով ԼՂ հատուկ կառավարման կոմիտեի կազմում:
1991 թվականի հուլիսից եղել է ՀՀ արդյունաբերության փոխնախարար, կապիտալ շինարարության վարչության պետ, համակարգելով երկրաշարժի գոտու վերականգնման աշխատանքները և մինչև 1993 թվականը միաժամանակ հանդիսանալով այդ կառույցի ներկայացուցիչը ԱՀ-ում:
1997 թվականի հունվարից աշխատում է Ռուսաստանի Դաշնությունում ԱՀ մշտական ներկայացուցչության աշխատակազմում:
2008 թվականի հունվարից մինչև 2012 թվականի դեկտեմբեր եղել է Արցախի գիտական կենտրոնի հիմնադիր տնօրեն:
