Չնայած Արցախում ունենք հակակարկտային կայանքներ, սակայն այս մասով անելիքներ դեռ շատ կան:
Կարկտահարությունից տուժած որևէ հողօգտագործող առանց աջակցության չի մնա. ԱՀ գյուղնախարար
ՍՏԵՓԱՆԱԿԵՐՏ, 26 հուլիսի, ԱՐՑԱԽՊՐԵՍ:«Արցախպրես»-ի թղթակցի հաղորդմամբ՝ այս մասին այսօր կայացած մամլո ասուլիսի ժամանակ ասել է ԱՀ գյուղատնտեսության նախարար Արամ Մխոյանը:
«Եթե մենք բյուջեում ունենայինք միջոցներ և հնարավորություն լիներ դրանք ուղղել այս ծրագրի ավարտմանը, մենք հնարավորինս Արցախի հողօգտագործողներին կպաշտպանեինք բնական աղետներից:
Այս տարի ունեցանք 5-6 հազար հա կարկտահարված տարածք, որի մի մասը՝ 50 տոկոսից ավելին էր վնասված: Ըստ ԱՀ կառավարության որոշման՝ աջակցություն է տրամադրվելու կարկտահարությունից տուժած հողօգտագործողներին:
Արդեն Մարտունու շրջանի Սոս և Մաճկալաշեն համայնքների՝ կարկտահարությունից տուժած հողօգտագործողներին տրամադրվել է աջակցություն. յուրաքանչյուր շնչին հատկացվել են հավի ճտեր և կեր: Սակայն դրանցով չենք սահմանափակվելու: Հացահատիկային մշակաբույսերով զբաղվող տուժած հողօգտագործողներին էլ անհատույց տրամադրվելու է բարձրակարգ սերմացու, որպեսզի հնարավորություն տանք հողօգտագործողներին՝ կազմակերպելու հաջորդ տարվա գյուղատնտեսական աշխատանքները: Կարկտահարությունից տուժած հողօգտագործողներն ազատվել են հարկերից: Այն հողօգտագործողները, որոնք ունեն վարկեր և փոխառություններ, ժամանակավորապես դրանք ևս սառեցվելու են:
Աջակցություն է նախատեսվում նաև այգիների ու տնկիների, բանջարեղենի մշակմամբ զբաղվող հողօգտագործողներին էլ տրամադրելու պարարտանյութ և սերմացու: Պլանավորել ենք նաև 1 հա-ի դիմաց նրանց փոխհատուցել 200 հազար դրամ:
Ծխախոտի ցանքատարածությունները համեմատաբար քիչ են վնասվել,-հավելել է Ա. Մխոյանը և ընդգծել,- կարկտահարությունից տուժած որևէ հողօգտագործող չի մնա առանց աջակցության»: