Անասնաբուծության ոլորտում բարեփոխումների ծրագրերն ընթացքի մեջ են:
«Տոհմային կայան»-ն անասնապահությամբ զբաղվողներին տրամադրում է նոր անասնատեսակներ
ՍՏԵՓԱՆԱԿԵՐՏ, 26 հուլիսի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այս մասին այսօր կայացած մամլո ասուլիսի ժամանակ ասել է ԱՀ գյուղատնտեսության նախարար Արամ Մխոյանը:
Ա. Մխոյանը՝ խոսելով «Տոհմային կայան»-ի մասին նշել է, որ այն այսօրվա դրությամբ անհամեմատելի լավ վիճակում է գտնվում:
«ԱՀ գյուղատնտեսության նախարարության «Տոհմային կայան»-ն այսօրվա դրությամբ անհամեմատելի լավ վիճակում է գտնվում: Այս տարիների ընթացքում շուրջ 450-500 գլուխ տոհմային ցուլեր ենք արտադրել, որի մի մասը սուբսիդավորված գներով՝ տրամադրել ենք տնտեսվարող սուբյեկտներին. դրանով հնարավորություն տալով տոհմային գործի բարելավմանը, որն էլ տոհմային կայանի գլխավոր գործառույթն է: Անցած տարի «Տոհմային կայան»-ի կովերը կերակրվել են սիլոս մշակաբույսով, այս տարի ևս կուտակելու ենք մինչև 4000 տոննա սիլոս: Եվրոպական ստանդարտներով կառուցած գոմում պետք է կովը որակյալ կեր ունենա: Մենք հնարավորություն ենք տալիս հողօգտագործողներին մշակել սիլոս՝ տրամադրելով նրանց այդ մշակաբույսի որակյալ սերմերը:
Բացի տոհմային ցուլերից, այս տարի անասնապահությամբ զբաղվողներին, վերարտադրության համար տրամադրել ենք նաև տոհմային երինջներ, կովեր, հորթեր՝ փորձելով աստիճանաբար նրանց ընդգրկել այս գործընթացի մեջ: Տարեկան 70-100 տոհմային ցուլ ենք տրամադրում մարդկանց. այն լուրջ վերահսկողության տակ է գտնվում: Ըստ մեր պայմանագրի շահառուն պարտավոր է գնված ցուլը պահել 3 տարի»,-ըստ էության ասել է Ա. Մխոյանը:
